Ոստիկանության ՊՊԾ գունդը գրաված «Սասնա ծռեր» զինված խմբի անդամներից 14-ի գործով հերթական դատական նիստում այսօր դատավոր Արտուշ Գաբրիելյանի եւ փաստաբանների միջեւ թեժ վիճաբանություն տեղի ունեցավ: Թեեւ դատավորը ավելի վաղ հայտարարել էր, որ խորհրդակցական սենյակ է հեռանում փաստաբան Մուշեղ Շուշանյանի ներկայությունը ապահովելու նպատակով, ընդմիջումից հետո հայտարարեց, որ նրա հանդեպ սանկցիա է կիրառում՝ համապատասխան գրությամբ դիմելով ՀՀ փաստաբանների պալատին:
Նիստերի դահլիճում ներկա պաշտպանները դժգոհեցին, որ դատավորն անօրինական գործողություններ է կատարում: Փաստաբան Տիգրան Հայրապետյանի, Ինեսսա Պետրոսյանի, Հարություն Բաղդասարյանի եւ դատավորի միջեւ թեժ լեզվակռիվ տեղի ունեցավ:
Խառնաշփոթի ընթացքում դատավորը կրկին ծիծաղելի իրավիճակում հայտնվեց՝ փաստաբան Ինեսա Պետրոսյանին դիմելով «պարոն»-ով: Փաստաբաններին լռեցնել չհաջողվեց: Դատավորն արդեն երրորդ անգամ ընդմիջեց նիստը՝ փաստաբան Հարություն Բաղդասարյանի հանդեպ սանկցիա կիրառելու հարցը քննարկելու համար:
Լուիզա ՍՈՒՔԻԱՍՅԱՆ
