2017թ.հուլիսի 13-ին Տավուշի մարզպետ Հովիկ Աբովյանը որոշում է ընդունել Տավուշի մարզպետարանի աշխատակազմի քաղաքացիական ծառայողներին պարգեւատրելու մասին: Այդ մասին որոշման մեջ նշված է, որ պարգեւատրումը կատարվում է 2017թ. առաջին կիսամյակի կատարողականի արդյունքներով, մարզպետարանի աշխատակազմի պահպանման ծախսերի «Քաղաքացիական, դատական եւ պետական այլ ծառայողների պարգեւատրում» հոդվածով նախատեսված միջոցների հաշվին:
Մարզպետը պարգեւատրման որոշման կատարումը հանձնարարել է մարզպետարանի աշխատակազմի ղեկավարի տեղակալ Ֆելիքս Ափինյանին: Տավուշի մարզպետի որոշման մեջ նշված է, որ մարզպետարանի աշխատակազմի քաղաքացիական ծառայողների պարգեւատրումը կատարվում է համաձայն որոշմանը կից հավելվածի, սակայն մարզպետարանի ինտերնետային կայքում որոշման հավելված ներկայացված չէ;
Հավելենք՝ Տավուշի մարզպետարանի աշխատակազմի աշխատողներին պետական բյուջեից դրամական պարգեւատրումները պարբերաբար բնույթ են կրում:
Ոսկան ՍԱՐԳՍՅԱՆ
