Չորեքշաբթի՝ հուլիսի 19-ին, Արցախի Հանրապետության Ազգային ժողովը ընտրելու է Հանրապետության նախագահին: Ազգային ժողովը նախագահի թեկնածության համար առաջադրել է երկու թեկնածու՝ գործող նախագահ Բակո Սահակյանին եւ Ստեփանակերտի նախկին քաղաքապետ Էդուարդ Աղաբեկյանին:
Մինչ ընտրությունները Aravot.am-ը Ստեփանակերտի փողոցներում հարցում է անցկացրել՝ պարզելու համար, թե արդյոք Արցախի քաղաքացիները տեղյակ են ընտրություններից, թեկնածուներից եւ կողմ են նախագահական ընտրությունների այս տարբերակին:
Հիշեցնենք՝ փետրվարի 20-ին անցկացված հանրաքվեի արդյունքում Արցախի Հանրապետությունը ընդունեց սահմանադրական փոփոխությունների նախագիծը: Ըստ այդ փոփոխությունների, Արցախը կիսանախագահական կառավարման համակարգից անցնելու է նախագահական կառավարման համակարգի, եւ առաջիկա երեք տարիները հանրապետությունը կկառավարվի անցումային փուլի ռեժիմով:
Հարցման մասնակիցներից ոմանք չգիտեին ո՛չ ընտրությունների, ո՛չ թեկնածուների մասին: Ոմանք լսել էին, որ ընտրություններ են նախատեսվում, գիտեին թեկնածուներին, բայց չգիտեին՝ նախագահական ընտրությունների կոնկրետ օրը:
Հարցման բոլոր մասնակիցները կողմ էին, որ Բակո Սահակյանը շարունակի պաշտոնավարել որպես Արցախի նախագահ:
Հարցվածներից մեկը վստահ էր, որ հինը ավելի լավ է, քան նորը. «Մենք մենակ Բակո Սահակյանին ենք ճանաչում, Էդուարդ Աղաբեկյանը ինչ արեց, մի պուլպուլակ ա շինե՞լ, երեխաների համար մի տեղ է շինե՞լ: Հեչ մինին էլ ուզում չի, մենակ Բակոն լինի թո՛ղ մեզ լավ ղեկավարի: Իմ ձայնը Բակո Սահակյանինն է»:
Հետաքրքրվել էինք նաեւ, թե արդյոք քաղաքացիները կողմ են նոր համակարգին, որով Ազգային ժողովն է ընտրելու հանրապետության նախագահին, թե կնախընտրեին իրենք ընտրել:
Հարցման մասնակիցներից մի տղամարդ պատասխանեց, որ կցանկանար, որ Արցախի նախագահը ընտրված լիներ ժողովրդի կողմից:
Իսկ հարցվածների մեծամասնությունը կարծում էր, որ ժողովուրդը արդեն իր ձայնը տվել է խորհրդարանին, եւ վստահում է ԱԺ պատգամավորներին նախագահ ընտրելու հարցում:
Ամի ՉԻՉԱԿՅԱՆ
