Երեւանի N17 դպրոցի տնօրենը եւս համապատասխան գրությամբ հետ է վերցրել «Իրազեկ քաղաքացիների միավորում» հասարակական կազմակերպության դեմ ներկայացրած հայցադիմումը եւ դատավորին խնդրել գործի վարույթը կարճել: Այս մասին այսօր պարզ դարձավ Աջափնյակ եւ Դավիթաշեն վարչական շրջանների ընդհանուր իրավասության դատարանում, որտեղ դատավոր Անի Մխիթարյանի նախագահությամբ սկսվեց գործի քննությունը:
Հիշեցնենք, որ 30 դպրոցների եւ մանկապարտեզների տնօրեններ դատի էին տվել «Իրազեկ քաղաքացիների միավորում» հասարակական կազմակերպությանը եւ վերջինիս համակարգող Դանիել Իոաննիսյանին՝ «ՀՀԿ-ն չարաշահում է վարչական ռեսուրսը դպրոցներում եւ մանկապարտեզներում» վերտառությամբ աղմկահարույց հրապարակման եւ ձայնագրությունների համար՝ համարելով, որ կազմակերպությունը զրպարտել է իրենց:
Դատավոր Անի Մխիթարյանը հայտնեց, որ հայցվոր՝ Երեւանի N17 դպրոցի տնօրեն Լիլիթ Թեւանյանը պատշաճ ծանուցվել է, սակայն նիստին չի ներկայացել՝ ուղարկելով նշյալ գրությունը եւ խնդրելով կարճել գործի վարույթը: Լրագրողների հետ զրույցում «Իրազեկ քաղաքացիների միավորման» շահերի ներկայացուցիչ, փաստաբան, ԱԺ պատգամավոր Արտակ Զեյնալյանն ասաց. «Ենթադրաբար, գիտակցել են, որ գործն անհեռանկար է: Կարծում եմ՝ դա է հրաժարման պատճառը: Սա քողարկված հայց է՝ ՀՀԿ անունից, ոչ թե տնօրենների: Որոշ տնօրեններ անգամ տեղյակ չեն եղել հայցից»:
Հավելենք, որ տնօրեններ Լիլիթ Թեւանյանի, ինչպես նաեւ՝ այսօր հայցից հրաժարված մեկ այլ տնօրենի՝ Երանուհի Հարությունյանի հետ կապ հաստատել չհաջողվեց,. նրանք արձակուրդում են:
Մանրամասն՝ տեսանյութում
Լուիզա ՍՈՒՔԻԱՍՅԱՆ
