Տավուշի մարզի Հովք գյուղի 38-ամյա բնակչուհի Իրինա Իշխանյանի որդին զորակոչային տարիքի է: Վերջինս առողջական որոշ խնդիրների պատճառով «հանրապետական հիվանդանոցում»՝ «Արմենիա» բժշկական կենտրոնում բժշկական հետազոտությունների է ենթարկվել: Տիկին Իրինան գոհ է այդ ԲԿ-ի աշխատակիցների կողմից զինակոչիկների նկատմամբ հոգատար վերաբերմունքից: Նա ասաց, որ այնտեղ նորակոչիկների առողջական վիճակը զննում են ամենայն բարեխղճությամբ, բժշկական նորագույն սարքավորումներով: Նա հայտնեց, որ հատկապես տպավորված է այդ ԲԿ-ի ուռոլոգիայի բաժնի վարիչի հոգատար վերաբերմունքից:
Իրինա Իշխանյանի վկայությամբ՝ հանրապետության տարբեր վայրերից նշված բժշկական կենտրոնում բուզննում են անցնում բազմաթիվ զինակոչիկներ: Նրանք օրերով մնում են այդ բուժհիմնարկում: Հետագայում նրանց վճարվում է Երեւան մեկնումի եւ վերադարձի տրանսպորտային ծախսերի գումարը, նաեւ ՝օրապահիկի գումար:
Տիկին Իրինան ասաց, որ հեռավոր մարզերից Երեւանում բուժզննվող սոցիալապես անապահով ընտանիքներից ժամկետային զինծառայության զինակոչիկներ կան, ովքեր Երեւանում մոտ հարազատներ չունեն, ոչ էլ՝ օրվա սննդի գումար: Հարկ է , որ նրանց հետո տրվող օրապահիկի գումարի փոխարեն այդ բուժհիմնարկում ամենօրյա սնունդ տրվի:
Զինակոչիկի մայր Իրինա Իշխանյանը այդ հորդոր-խնդրանքն ուղղում է նախագահ Սերժ Սարգսյանին, որպեսզի խնդիրը շուտափույթ լուծվի:
Ոսկան ՍԱՐԳՍՅԱՆ
