Ոստիկանության ՊՊԾ գունդը գրաված Սասնա ծռեր զինված խմբի անդամներից 18-ի գործով դատական նիստում այսօր դատավոր Արտուշ Գաբրիելյանը երկրորդ անգամ սանկցիա կիրառեց ամբաստանյալների պաշտպաններից Լուսինե Սահակյանի հանդեպ: Ապա ամբաստանյալներից Թաթուլ Թամրազյանը հայտարարեց՝ «վեր ենք կենում ու գնում, քանի որ մեր ընկերներին չեք վերադարձնում նիստերի դահլիճ»: Հիշեցնենք, որ դատարանի հանդեպ անհարգալից վերաբերմունքի համար մյուս ամբաստանյալները, բացի Թաթուլ Թամրազյանից, Հովհաննես Հարությունյանից եւ Արամ Մանուկյանից, որոշակի ժամանակով հեռացվել են նիստերից:
Դատավորն ասաց, որ Թամրազյանին չի թույլատրում հեռանալ: Թամրազյանը, սակայն, չլսեց ու հեռացավ, ինչի հետեւանքով դատավորը նրա հանդեպ էլ սանկցիա կիրառեց՝ վեց ժամով հեռացնել նիստերից:
Թամրազյանի պաշտպան Մոնիկա Մարգարյանը եւս հեռացավ՝ պատճառաբանելով, որ առանց իր պաշտպանյալի չի կմասնակցի նիստերին: Մարգարյանի հանդեպ եւս սանկցիա կիրառվեց:
Ապա հերթը ամբաստանյալներից Արամ Մանուկյանի ինքնությունը ճշտելուն հասավ: Դատավորը հրապարակեց նրա անձնագրի տվյալներն առ այն, որ ծնվել է ԼՂՀ-ում՝ Ստեփանակերտում: «ՀՀ մարզ Արցախում»,-ուղղեց Արամ Մանուկյանը: Նրա պաշտպան Հրանտ Գեւորգյանը պարզաբանեց՝ Արամ Մանուկյանը հայկական երկու պետությունները որպես մեկ ամբողջություն է համարում:
Այնուհետեւ դատավոր Արտուշ Գաբրիելյանն ընթերցեց ամբաստանյալների պաշտպաններից Դավիթ Գյուրջյանի, Երվանդ Վարոսյանի, Գրիշա Բալասանյանի, Լուսինե Սահակյանի եւ Արայիկ Պապիկյանի գրությունն առ այն, որ իրենք լքում են դատարանը, քանի որ դատավորը հրաժարվում է վերացնել իրենց պաշտպանյալների հանդեպ սանկցիան:
Նիստը կրկին ընդմիջվեց, որպեսզի դատավորը նշյալ փաստաբաններին պատասխանատվության ենթարկելու նպատակով որոշում կայացնի:
Լուիզա ՍՈՒՔԻԱՍՅԱՆ
