Դեմոկրատ կոնգրեսականներ Բրեդ Շերմանը և Ալ Գրինը Ներկայացուցիչների պալատի քննարկմանն են ներկայացրել ԱՄՆ նախագահ Դոնալդ Թրամփի իմփիչմենթի նախաձեռնություն:
Նախաձեռնության հեղինակ, Կալիֆորնիան ներկայացնող Բրեդ Շերմանը Թրամփին մեղադրել է այն բանում, որ նա խոչընդոտել է արդարադատության գործողություններին՝ ԱՄՆ նախագահական ընտրություններին Ռուսաստանի հնարավոր միջամտության քննության գործում: Որպես այդ գործողությունների ապացույց՝ կոնգրեսականը հիշեցրել է Հետախուզությունների դաշնային բյուրոյի ղեկավար Ջեյմս Կոմիին պաշտոնից ազատելու Թրամփի որոշումը:
Շերմանը նման քայլի է դիմել այն բանից հետո, երբ ԱՄՆ նախագահի որդին՝ Թրամփ-կրտսերը խոստովանեց, որ նախընտրական քարոզարշավի ընթացքում հանդիպել է ռուս փաստաբան Նատալիա Վեսելնիցկայայի հետ: Նրա խոսքով՝ փաստաբանը խոստացել էր իրեն պաշտոնական տեղեկություն տրամադրել Ռուսաստանի իշխանությունների մասին, որոնք կարող էին վնասել Թրամփի մրցակից Հիլարի Քլինթոնին:
Շերմանի խոսքով՝ իր այս գործողությունը կարող է ծառայել որպես նախազգուշացում Սպիտակ տանը և իրավական մեխանիզմ ստեղծել Թրամփին հեռացնելու համար:
Նա նշել է, որ ցանկանում է «սկսել այդ երկարատև գործընթացը, որպեսզի պաշտպանի երկիրը իշխանության չարաշահումից, արդարադատությանը խոչընդոտելուց»:
ԱՄՆ պատմության մեջ իմփիչմենթի ենթարկվել է երկու նախագահ՝ Էնդրյու Ջեքսոնը (1868թ.) և Բիլ Քլինթոնը (1998թ.), բայց հետո նրանք երկուսն էլ արդարացվել են Սենատի կողմից:
Պատրաստեց՝ Վիկտորյա ԱՆԴՐԵԱՍՅԱՆԸ
