Բաքվի՝ ծանր հանցագործությունների դատարանում տեղի է ունեցել բլոգեր Ալեքսանդր Լապշինի գործով հերթական դատական նիստը՝ դատավոր Ալովսաթ Աբասովի նախագահությամբ, գրում է haqqin.az-ը:
Նիստի ընթացքում դատավորը որպես լրացուցիչ վկա կանչել է Դատական փորձաքննության կենտրոնի աշխատակից Ալմազ Բայրամովային: Վերջինս ասել է, որ իրեն են տրամադրել համացանցում Լապշինի կողմից արված գրառումները, և ինքը գնահատական է տվել դրանց:
Դատարանին ներկայացվել է փորձագիտական գնահատական, որում նշվում է, որ Լապշինը բազմիցս հակաադրբեջանական կոչեր է արել, մասնավորապես «օկուպացված Ղարաբաղն անվանել է «Արցախ», և ասել, որ Ղարաբաղը Հայաստանի մաս է կազմում»: Վկայի խոսքով՝ Լապշինը նաև հայտարարել է, որ թեև իր անունը ներառված է Ադրբեջանի ԱԳՆ «սև ցուցակում», այնուամենայնիվ ինքը կշարունակի այցելել Արցախ:
Ըստ haqqin.az-ի՝ Լապշինն իր հերթին ասել է, որ այդ գրառումներում պարզապես մատնանշել է այն փաստը, որ Հայաստանը վերահսկում է Ադրբեջանին պատկանող բարձունքները: Բացի այդ, նրա խոսքով՝ «Ղարաբաղ» հայերենով նշանակում է «Արցախ»:
Դատավորն այնուհետև ասել է, որ ցանկանում է հայտարարել դատական քննության ավարտի մասին, և կողմերի կարծիքն է հարցրել: Մեղադրող և պաշտպանվող կողմերը առարկություն չեն հայտնել: Դատական քննությունը հայտարարվել է փակված:
Հերթական նիստը նշանակված է հուլիսի 14-ին:
Պատրաստեց՝ Վիկտորյա ԱՆԴՐԵԱՍՅԱՆԸ
