«Մտավախություն չունե՞ք, որ ՏՏ ոլորտի մասնագետների արտահոսք կլինի, հատկապես, որ մեր երկրում բարձրակարգ մասնագետների դեֆիցիտ կա»,-այսօր այսպիսի հարց ուղղեցին տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանին, որը ներկայացրեց, թե ինչպիսի պայմանավորվածություններ են ձեռք բերել ՏՏ ոլորտի մասնագետների` դրսում աշխատելու հետ կապված: Ըստ պարոն Մարտիրոսյանի, «Թեքնոլոջի Ընդ Սայնս Դայնամիքս» ընկերությունը նախարարության հետ հուշագիր է կնքել, համաձայն որի, ընկերությունը պետք է, այսպես ասած, արտահանի ՏՏ ոլորտի մեր գիտական գաղափարները: Առաջին այցը եղել է Բոլիվիա, որտեղ ընկերության հիմնադիր տնօրեն Վահան Շաքարյանի խոսքով, դեռ զարգացած չեն էլեկտրոնային եղանակով կատարվող գործարքները եւ մարդիկ տարրական մուծումների համար մեկ բանկում ժամերով հերթ են կանգնում:
Պատասխանելով հարցին Վահան Մարտիրոսյանն ասաց, որ մասնագետների շարժն ամբողջ աշխարհում է. «Մասնագետները միշտ փորձում են տարբեր տեղեր գտնել, եթե իրենք իրենց տեղից գոհ են, դժվար թե տեղափոխվեն: Իհարկե, Հայաստանում ՏՏ մասնագետների պակաս ունենք եւ դրա վրա աշխատում ենք, բայց պետք չէ մտածել, որ մենք ունենանք լավ ՏՏ մասնագետ, վախենանք ինքը դուրս գա»:
Վահան Շաքարյանի խոսքով, իրենց պայմանավորվածությունների արդյունքում ոչ թե ինժեներների են դուրս տանելու, այլ` մարքեթինգի, PR-ի մասնագետներին, որոնք կկազմակերպեն այդ ապրանքների վաճառքը:
Հարցին, թե արդյունքները ե՞րբ կերեւան, պարոն Շաքարյանն ասաց, որ իրենք ոչ թե ծիրան կամ խաղող են արտահանում, այլ` գիտություն եւ արագ արդյունք ակնկալելը ճիշտ չէ: Ըստ Վահան Շաքարյանի, նոր գաղափարների պահանջարկ կա գյուղատնտեսության մեջ. «Օրինակ` Բոլիվիայում կովերի վզին կախելու «Ջի Փի Ար Էս» համակարգ է պետք, որպեսզի արածելու դուրս եկած կովերին հեշտությամբ գտնեն, 8 միլիոն կով ունեն եւ պետք է այնպես լինի այդ համակարգը, որպեսզի կարիք չլինի ամեն կովի հետեւից վազել եւ էլեմենտը փոխել»:
Ըստ նրա, բացի Բոլիվիայից համագործակցելու են նաեւ Իտալիայի, Գերմանիայի, ԱՄՆ-ի եւ այլ երկրների հետ:
Լուսինե ԲՈՒԴԱՂՅԱՆ
