Ոստիկանության ՊՊԾ գունդը գրաված «Սասնա ծռեր» զինված խմբի անդամների 14-ի գործով դատական նիստում այսօր քննարկվեց դատավոր Արտուշ Գաբրիելյանի ինքնաբացարկի հարցը: Ամբաստանյալների պաշտպանները պնդեցին, որ դատավորը պետք է ինքնաբացարկ հայտնի, քանի որ նախորդ նիստերից մեկում երբ նա նստած էր նիստերի դահլիճում, դատարանի շենքում ոստիկանները ծեծել են ամբաստանյալներից մի քանիսին, այդ թվում՝ Արայիկ Խանդոյանին:
«Դահլիճում կրկին ներկա է Խանդոյանին ծեծած փոխգնդապետ Ղազարյանը: Հավանական է, որ Խանդոյանը կրկին ծեծի եւ խոշտանգումների կենթարկվի: Ծեծի ձայներ էին գալիս, մինչդեռ դուք դահլիճում նստած ոչինչ չէիք ձեռնարկում: Այս հիմքով, կարծում եմ, որ դուք չեք կարող այս գործով արդարադատություն իրականացնել: Դուք կողմնակալ եք եւ կաշկանդված»,- դատավորին ասաց Արայիկ Խանդոյանի պաշտպաններից Արա Ղարագյոզյանը:
Պաշտպաններից Լուսինե Սահակյանը պնդեց, որ նշյալ ոստիկանը կասկածյալի կարգավիճակում է եւ իրավունք չունի առնչվել տուժողի հետ:
Դատավորը, սակայն, համարեց, որ այս պահին խոշտանգումների մասին հայտարարություններ անելն անիմաստ է, նման վտանգ չկա:
Պաշտպանները նաեւ դժգոհեցին, որ ամբաստանյալներից Արայիկ Խանդոյանը եւ Գագիկ Եղիազարյանը սանկցիայի են ենթարկվել եւ հեռացվել նիստերի դահլիճից: Պաշտպանները պահանջեցին ապահովել նրանց ներկայությունը:
Ամբաստանյալ Պավլիկ Մանուկյանը բղավեց, որ դատավորը գործի արդար քննություն չի իրականացնում. «Պահանջում եմ ընկերներիս: Նրանց խոշտանգվելուց հետո չեմ տեսել: Ափսոսում եմ ձեզ, դատավոր»:
Դատավորը կրկին ընդմիջում հայտարարեց, արդեն երկրորդ անգամ:
Լուիզա ՍՈՒՔԻԱՍՅԱՆ
