ԱԺ-ում Մարդու իրավունքների պաշտպանի գործունեության տարեկան գործունեության մասին հաղորդման քննարկումը շարունակվում է: «Ելք» խմբակցության ղեկավար Նիկոլ Փաշինյանն անդրադարձավ ցմահ ազատազրկման դատապարտվածների խնդրին:
Նա ասաց, որ ՀՀ-ում ցմահ ազատազրկման դատապարտված 97 անձ կա, 32-ը մահապատժի դատապարտված անձինք են, ովքեր մինչեւ 2003-ը մահապատժի են դատապարտվել, ի կատար չի ածվել, դրանից հետո, երբ որպես պատժատեսակ մահապատիժը վերացավ, դատապարտվեցին ցմահ ազատազրկման: 2011-ից մինչ օրս 5 հոգի են ցմահ ազատազրկման դատապարտվել:
Մինչ 2011-ը դատավորը իր ներքին համոզմունքով մարդուն առավելագույնը ժամկետային ազատազրկում պիտի տար 10-15 տարի, եթե նա գտնում էր, որ ավելի շատ պետք է ազատազրկվի, քան 15 տարի, ասենք, 18-19 տարի ազատազրկման ենթակա հանցագործություն է արել, պետք է դատապարտեր ցմահ ազատազրկման, 2011-ից հետո օրենսգիրքը փոխվեց եւ հնարավորություն եղավ 18 տարի օրինակ ազատազրկել:
Նախկինում ցմահ ազատազրկման դատապարտվածներ կան, որոնք հարցադրում են առաջ բերում, այսօրվա գործող օրենքով նրանք պիտի 18-19 տարի ազատազրկման դատապարտվեին, ոչ թե ցմահ, այսինքն, իրենք հավասար պայմաններում չեն հայտնվել ներկայիս ցմահ ազատազրկման դատապարտվածների հետ:
Փաշինյանն ասաց, որ այդ 97 անձանց գործերը նոր օրենսդրության շրջանակներում պետք է վերանայել. «Մենք պետք է հոգ տանենք ցմահ ազատազրկման դատապարտված մարդկանց պայմանների մասին: Շատ ավելի ծանր է նման պայմաններում ապրել, քան մարդկանց գնդակահարել: Դատապարտվածների կեսից ավելին պահվում է իրենց ընտանիքի անդամների կողմից: Այստեղ մեծ կոռուպցիոն ռիսկեր կան, գումարները փոշիացվում են: Գոնե ցմահ ազատազրկման դատապարտվածների համար կարելի է արժանավայել պայմաններ ապահովել: Դա առաջին հերթին մեր հանրության քաղաքակրթության մակարդակի հարց է»:
Ելույթի վերջում Փաշինյանը նկատեց՝ Արման Թաթոյանին ՀՀԿ-ականները գովեստի խոսքեր են ասում ԱԺ-ում, իսկ սա խոսում է այն մասին, որ Թաթոյանը մյուս օմբուդսմենների պես ժամկետից շուտ ստիպված չի լինի հրաժարական տալ:
Հռիփսիմե ՋԵԲԵՋՅԱՆ
