ԱԺ-ում ԿԸՀ-ի 2016-ի գործունեության մասին հաղորդումն է քննարկվում: Իր ելույթում «Ծառուկյան» դաշինքի պատգամավոր Գեւորգ Պետրոսյանն անդրադարձավ ընտրակաշառքի, ձայնագրությունների մասին ընդդիմադիրների քննադատություններին հաջորդած Գեւորգ Կոստանյանի արդարացումներին:
Գեւորգ Պետրոսյանի խոսքերով՝ ընտրությունների նախընտրական շրջանն ընթացել է խայտառակ իրավախախտումներով: ԿԸՀ-ն էլ չի օգտվել իր լիազորությունների ամբողջական ծավալից: Կոստանյանը հիշեցրել էր, որ անմեղության կանխավարկած կա, կարող է ձայնագրությունները կեղծ են, ինչո՞ւ պիտի դրա համար ընտրական գործընթացը խափանվեր: Այն բացատրությունը, որ դպրոցների տնօրենները կարող է իրենց դասաժամերից, աշխատանքից հետո են զբաղվել ցուցակագրությամբ, հրավիրել աշակերտների ծնողներին, Գեւորգ Պետրոսյանի համար ընդունելի չէ. «Այդ մանկավարժը, ինչ է, դասաժամերից դուրս դառնում է Ձյունանուշի՞կ, թե՞ Ձմեռ պապ: Նա պահպանում է իր կարգավիճակը եւ իր ազդեցությունը աշակերտների ծնողների նկատմամբ»:
Գեւորգ Պետրոսյանի խոսքերով՝ «Անձամբ ինձ զանգում է ոստիկանության ինչ-որ թաղային տեսուչ, ներկայանում է, ասում է՝ ձեր ընտանիքում քանի՞ հոգի կա, ովքե՞ր են: Իմ այն հարցին՝ էդ ո՞ր օրենքով եք ղեկավարվում իմ անձնական կյանքի, ընտանիքի մասին տեղեկություններ հարցնելու՝ ասում է՝ գիտեք, ես նոր թաղայինն եմ, փոխել եմ իմ գործելաոճը, պիտի իմ բնակիչների մասին տեղեկացված լինեմ, խնդիրներից: Ընտրություններից հետո էդ նույն ոստիկանը ուղղակի մրցավազքի է դուրս եկել Խաչատուր Աբովյանի հետ Մասիս սարը մագլցելու հարցում, մինչեւ հիմա չկա, որ իմանա մեր ընտանիքում ինչ խնդիրներ կան, մեր բակում ինչ խնդիրներ կան»:
Պետրոսյանն ասաց, որ հիմա իրենց բակում ինքն է կարգուկանոնը պաշտպանում:
Պատգամավորը հիշեցրեց, թե ինչպես են Գագիկ Ծառուկյանին նկատողություն արել՝ քարոզարշավի ժամանակ: Ըստ նրա, Տավուշի մարզում «հուսաբեկ եւ հավատաջարդ» մի գյուղացու օգնելու խոստում է տվել, ԿԸՀ-ն անմիջապես դաշինքին նկատողություն է հայտարարել:
Հռիփսիմե ՋԵԲԵՋՅԱՆ
