Գյումրեցի պատգամավոր Վարդեւան Գրիգորյանը այսօր ԱԺ-ում Կենտրոնական ընտրական հանձնաժողովի 2016-ի գործունեության մասին հաղորդման քննարկման ժամանակ ԿԸՀ նախագահ Տիգրան Մուկուչյանին փոխանցեց գյումրեցիների դժգոհությունը. «Գյումրիի ավագանու ընտրություններից հետո գիտե՞ք ինչ է շրջանառվում գյումրեցիների կողմից, որ պարոն Մուկուչյան, մենք ձեզ ի՞նչ վատություն էինք արել, որ դուք մեր 66 տոկոս ձայները անտեսեցիք ու 34 տոկոս ձայն ունեցող Բալասանյան Սամվելին կարգեցիք Գյումրիի քաղաքապետ: Չե՞ք գտնում, որ այդ օրենքը ունի լուրջ թերություններ, դուք եք կիրառության մեջ դնում էդ օրենքը»:
Վարդեւան Գրիգորյանը հիշեցրեց Սահմանադրության հոդվածը՝ ժողովուրդն է ձեւավորում իշխանությունը, իսկ այսօր ստացվում է, որ ժողովրդի կողմից 66 տոկոս ձայն ունեցող ընդդիմությունը գործնականում չի կարողանում իր աշխատանքը իրականացնել ոչ օրենսդիրում, ոչ գործադիրում:
Տիգրան Մուկուչյանը պատասխանեց, որ դրանք նոր իրավակարգավորումներ չեն, նախորդ Ընտրական օրենսգրքում էլ են եղել: Գյումրիի եւ Վանաձորի ընտրությունների ժամանակ էլ Մուկուչյանն ասաց, որ քաղաքապետին ինքը չի կարգել, բոնուսային համակարգն է կիրառվել: Այդ համակարգը բազմաթիվ երկրներ են կիրառում:
Մուկուչյանն ասաց, որ եթե նման խնդիր կա, օրենսդիրները պետք է զբաղվեն, իրենք էլ պարտավոր են դրանք կյանքի կոչել լիարժեք ծավալով:
Հռիփսիմե ՋԵԲԵՋՅԱՆ
