Տարվա այս ժամանակահատվածում Տիգրանակերտ այցելող զբոսաշրջիկների թվի աննախադեպ աճ է գրանցվել: Վերջին տվյալներով նախորդ տարվա համեմատ աճը կազմել է 220%, իսկ 2015թ. համեմատ` 70%: Այս մասին Aravot.am-ի հետ զրույցում ասել է Արցախի Հանրապետության էկոնոմիկայի փոխնախարար Սերգեյ Շահվերդյանը:
«Արցախ ժամանած զբոսաշրջիկների ընդհանուր թիվը նույնպես աճել է նախորդ տարվա համեմատ 40%-ով, իսկ 2015թ.համեմատ 20%-ով: Օտարերկրյա զբոսաշրջիկների հիմնական հոսքը Ռուսաստանից, ԱՄՆ-ից և եվրոպական երկրներից է»,- նշել է փոխնախարարը:
Նրա խոսքով Արցախում զբոսաշրջային ենթակառույցների խնդիր չկա և եղած պայմանները բավարարում են զբոսաշրջիկների առկա հոսքին:
Անդրադառնալով զբոսաշրջության նման աշխուժացմանը Սերգեյ Շահվերդյանը իրավիճակը պայմանավորել է հետևյալ գործոններով. «Այցելող զբոսաշրջիկների թվի աճը հիմնականում պայմանավորված է Հայաստանի զբոսաշրջության ազգային կոմիտեի ներդրած ջանքերի գործոնով, որը ուղղված է Արցախը զբոսաշրջային ուղղություններում ակտիվորեն ներառելուն: Դրան զուգահեռ ռուսաստանցի զբոսաշրջիկների պարագայում խթան է հանդիսացել ներքին անձնագրերով Հայաստան ժամանելու նրանց տրված հնարավորությունը»,- ասել է նա և հավելել, որ սեզոնի ընթացքում ակնկալվում է զբոսաշրջիկների հոսքի շարունակ ակտիվություն:
Դավիթ ԱԲԱՂՅԱՆ
