Արցախի Հանրապետության Ազգային ժողովի պատգամավոր, ‹‹Վերածնունդ›› խմբակցության ղեկավար Հայկ Խանումյանը Aravot.am-ի հետ զրույցում ասել է, որ խմբակցությունը անցումային շրջանի նախագահի ընտրության ժամանակ դեմ է քվեարկելու Բակո Սահակյանի թեկնածությանը:
«Ակնհայտ է, որ խմբակցությունը դեմ է քվեարկելու: Եթե այլ թեկնածուներ ի հայտ գան, ապա այդ դեպքում գործադիր մարմնի նիստ կանենք և նոր որոշում կկայացնենք: Ինչ վերաբերում է մեր խմբակցությանը, ապա թեկնածու չենք առաջադրելու»,- պարզաբանել է ընդդիմադիր պատգամավորը:
Նրա խոսքով խորհրդարանական մեծամասնություն կազմող ուժերի անցկացրած համագումարների արդյունքում վերջիններիս կողմից Բակո Սահակյանի թեկնածության առաջադրումը կանխատեսելի էր:
«Դեռ այն ժամանակ, երբ Արցախում սկսվեց սահմանադրական փոփոխությունների գործընթացը, մենք ասել էինք, որ այդ ամենը կատարվում է իշխանության վերարտադրության համար: Կարծում եմ այս ամենը նաև միջոց է կենտրոնացնելու իշխանությունը մեկ անձի ձեռքում, ինչը Արցախի համար քաղաքական և տնտեսական լուրջ հետևանքներ կթողնի բացասական առումով: Ես կցանկանայի մեր քաղաքական ուժերը լինեն ամբիցիաների կրող, առաջ քաշեն նոր գործիչների, ովքեր որ նոր գաղափարներով հանդես կգան հասարակության համար», -նշել է նա:
Անդրադառնալով շփման գծում տիրող իրավիճակին Հայկ Խանումյանը ասել է, որ Ադրբեջանը իր հստակ քաղաքականությունն է վարում վերջին ժամանակաշրջանում և փորձում մեզ պարտադրել լայնածավալ պատերազմի սցենար:
«Կարծում եմ դրան պետք է պատրաստ լինեինք դեռ տարիներ առաջ, երբ Ադրբեջան դիպուկահարների և դիվերսիոն խմբերի միջոցով ակտիվորեն ագրեսիայի էր դիմում: Ցավոք սրտի մեր անուշադրության և թափթփվածության արդյունքում ունեցանք «2016թ-ի ապրիլ»: Դրանից հետո առաջնագծում իրականացվեցին ինժեներական աշխատանքներ, սակայն դա բավարար չէ այսօրվա իրավիճակի պարագայում: Կարծում եմ, պետք մեր կողմից լինի կոշտ պատասխան, որին զուգահեռ պետք է ունենանք նաև ժամանակակից միջոցներ››,-ասել է խորհրդարանի պատգամավորը և հավելել, որ բանակցությունները կարող են հարցին լուծում տալ միայն այն դեպքում, երբ պարտադրողի դերում լինի հայկական կողմը, և բանակցող կողմերը լինեն Ստեփանակերտը և Բաքուն՝ առանց միջնորդների:
Դավիթ ԱԲԱՂՅԱՆ
