Ռուսաստանի ԱԳՆ-ն կրկին բարձրացրել է Ադրբեջանի տարածք հայկական ծագում ունեցող Ռուսաստանի քաղաքացիների արգելքի հարցը, ինչը չի համապատասխանում դիվանագիտական էթիկային և մեծ զարմանքի ու տարակուսանքի տեղիք է տալիս: Այս մասին ասվում է Ադրբեջանի ԱԳՆ-ի տարածած հաղորդագրության մեջ, հաղորդում է Trend-ը:
Հայտարարության մեջ նշվում է, որ ռուսական կողմի ցուցաբերած ոչ բարեկամական վերաբերմունքը ոչ մի կերպ չի համապատասխանում երկու երկրների ռազմավարական գործընկերության ոգուն:
«Ադրբեջանի ու Ռուսաստանի միջև դիվանագիտական հարաբերությունների հաստատման վերջին 25 տարիների ընթացքում այդ հարցը երբեք օրակարգում չի եղել: Դժվար է բացատրել ռուսական կողմի բացառիկ ակտիվությունը վերջին շրջանում»,- ասվում է հայտարարության տեքստում:
Դրանում նաև նշվում է, որ հայկական ծագում ունեցող Ռուսաստանի քաղաքացիները կարող են մուտք գործել Ադրբեջան նախօրոք տեղեկացնելու և զգուշացնելու պարագայում:
«Ադրբեջանը, որն ունի խորը բազմամշակութայնության ավանդույթներ, և որտեղ ապրում են տարբեր էթնիկական ծագմամբ խմբեր, իր ազգային շահերից և անվտանգության նկատառումներից ելնելով՝ ինքն է որոշում կայացնում այլ պետությունների քաղաքացիների մուտքի վերաբերյալ»,- ասվում է հայտարարության մեջ:
Հիշեցնենք, այսօր դարձյալ Ռուսաստանի ԱԳՆ պնդել էր իր դիրքորոշումը Ադրբեջանում հայկական ծագում ունեցող Ռուսաստանի քաղաքացիների նկատմամբ խտրականության երևույթի վերաբերյալ:
Պատրաստեց՝ Վիկտորյա ԱՆԴՐԵԱՍՅԱՆԸ
