Սահմանային վերջին միջադեպից հետո, երբ հայկական կողմը պատասխանեց եւ ոչնչացրեց ադրբեջանական գյուղի մոտ տեղակայված հակառակորդի կրակակետը (զոհվել են ադրբեջանցի երեխա եւ կին), Ադրբեջանում աննախադեպ ռազմատենչ հիստերիայի ալիք է բարձրացվել, որին մասնակցում է անգամ նախագահի դուստրը, օգտագործվում են քարոզչական բոլոր հարթակները: Այս մասին այսօր «Նովոստի Արմենիա» մամուլի կենտրոնում հայտարարեց Razm.info մասնագիտացված կայքի համակարգող Կարեն Վրթանեսյանը: «Սա Բաքվի քարոզչամեքենայի համար հարմար առիթ է խոսել պատերազմի մասին եւ վրեժի կոչեր անել, դժգոհություններ հայտնել ԵԱՀԿ Մինսկի խմբին»,- ասաց նա:
Փորձագետը նշեց՝ այդ գյուղ՝ Ալխանլին, առաջին անգամ չէ, որ ադրբեջանական զինուժի կողմից օգտագործվում է որպես կենդանի վահան. «Կարծես հատուկ սպասում էին նման բան լիներ, որ ռազմատենչ հիստերիա սկսեին: Այնպիսի խանդավառությամբ են տարածում երեխայի արյունոտ լուսանկարները… բայց Ադրբեջանը չի հայտարարում, որ երեխան զոհվել է այն պատճառով, որ ադրբեջանական զինուժը սառնասրտորեն թաքնվում է բնակչության հետեւում»:
Կարեն Վրթանեսյանը նշեց, որ վերջին մոտ մեկ տարում նույն գյուղի՝ Ալխանլիի մոտ միջադեպեր էլի են եղել, քանի որ Ադրբեջանն իր կրակակետերը տեղակայել է բնակելի տարածքին մոտ:
Razm.info-ի վերլուծաբան Գարիկ Հարությունյանը մանրամասնեց. «Դեռեւս 2015թ. նույն գյուղի մոտ կրակակետեր են տեղադրել: Կրակ են բացել, պատասխան են ստացել ու մեղադրել հայկական կողմին: Գյուղում խրամատներ կան, հրետանու մարտկոցներ: Մի ամբողջ դիվիզիոնի դիրքեր են տեղակայված այս գյուղի մոտ: Եթե հայկական կողմից կրակեն ադրբեջանական հրետանու վրա, պետք է կրակեն իրենց գյուղի վրայով: Նույնն էլ իրենք»:
Կարեն Վրթանեսյանը չի կարծում, որ Ադրբեջանը կհամարձակվի դիմել լայնածավալ ռազմական գործողությունների. «Բայց չի բացառվում, որ սադրանքներ են նախապատրաստում»:
Լուիզա ՍՈՒՔԻԱՍՅԱՆ
