«Ադրբեջանի հերթական սադրանքին ի պատասխան հայկական կողմն իր իրականացրած անհամաչափ գործողություններով խնդիր ուներ ոչնչացնելու այն կրակակետը, որտեղից ադրբեջանական կողմը կրակ էր վարում հայկական դիրքերի ուղղությամբ: Դա հայկական կողմը բարեհաջող իրականացրեց, սակայն միջադեպը եւս մեկ անգամ ընդգծում է այն փաստը, որ ադրբեջանական բանակն իր կրակակետերը տեղադրում է իր իսկ գյուղերում: Բնականաբար, զինվորների եւ քաղաքացիական հասարակության շրջանում զոհերի փաստի պատասխանատվությունն ընկնում է Ադրբեջանի վրա»,-Aravot.am-ի հետ զրույցում անդրադառնալով հուլիսի 4-ին արցախաադրբեջանական սահմանին հակառակորդի իրականացրած հերթական սադրանքին եւ դրան հաջորդած հայկական կողմի պատասխանին, ասաց քաղաքագետ Նարեկ Մինասյանը:
Նա փաստեց, որ վերջին ամիսներին Ադրբեջանը սահմանային միջադեպերով փորձում էր հայկական կողմի վրա ճնշում գործադրել բանակցային գործընթացում, ինչը չէր հաջողվում. «Ըստ էության, երեկ ադրբեջանական կողմի պլանները հերթական անգամ տապալվեցին: Սակայն Ադրբեջանը բավականին ակտիվ տեղեկատվական արշավ է սկսել՝ շահարկելով երկու քաղաքացիական անձի զոհվելու գործոնը եւ փորձելով այդ կերպ ազդել միջազգային հանրության վրա»:
Քաղաքագետն անդրադարձավ նաեւ միջադեպի առնչությամբ ԵԱՀԿ Մինսկի խմբի հայտարարությունը, որով եռանախագահները կողմերին կոչ են անում դադարեցնել ռազմական գործողությունները. «Սա խոսում է այն մասին, որ հետաքննության մեխանիզմների ներդրումը հատկապես այս պահին անհրաժեշտություն է եւ կարեւոր: Դրանք չեն փոխարինում քաղաքական բանակցություններին, բայց էական նշանակություն ունեն: Եթե Սանկտ-Պետերբուրգի եւ Վիեննայի պայմանավորվածությունները կյանքի չկոչվեն, նման սահմանային միջադեպերը, որոնց առնչությամբ հնչող ոչ հասցեական հայտարարությունները կանխարգելիչ չեն, շարունակվելու են»:
Նարեկ Մինասյանը միաժամանակ նշեց, որ հայկական կողմն առավել հետեւողական պետք է առաջ մղի նշյալ պայմանավորվածությունները կյանքի կոչելու անհրաժեշտությունը. «Ադրբեջանն էլ փորձելու է խուսափել դրանից»:
Լուիզա ՍՈՒՔԻԱՍՅԱՆ
