«Դա միջազգային իրավունքի խախտում է: Ադրբեջանը վավերացրել է բոլոր համապատասխան փաստաթղթերը, ինչը նրան պարտավորեցնում է ռազմական բոլոր օբյեկտները տեղակայել բնակելի վայրերից որոշակի տարածության վրա: Իսկ եթե նրանք տեղակայվում են բնակելի վայրերում կամ դրանց մոտ, բնակելի վայրը եւս դառնում է ռազմական օբյեկտ»,-Aravot.am-ի հետ զրույցում ասաց միջազգային իրավունքի փորձագետ Տարոն Սիմոնյանը:
Հիշեցնենք, որ հուլիսի 4-ի երեկոյան ադրբեջանական կողմը իր իսկ բնակավայրից հայկական կողմի հանդեպ կիրառել է հրթիռահրետանային կայանք, իսկ հայկական կողմի պատասխանի հետեւանքով զոհվել են կին եւ մանկահասակ երեխա:
Տարոն Սիմոնյանի բնորոշմամբ՝ Ադրբեջանը փորձում է միջազգային բոլոր հարթակներում միջադեպը շահարկել՝ ասելով, թե իբր հայերն են ագրեսոր եւ չեն հարգում պատերազմ վարելու մեթոդներն ու միջոցները:
Փորձագետի խոսքով՝ եթե այս դեպքում ադրբեջանական ռազմական նշանակության օբյեկտը տեղակայված է եղել բնակավայրում, ապա նախորդ տարվա ապրիլյան դեպքերի ժամանակ ադրբեջանական կողմի թիրախը եղել է հենց հայկական դպրոցը եւ դպրոց գնացող երեխան, որը զոհվեց: «Դա մարդասիրական իրավունքի կոպիտ խախտում է»,-նշեց Սիմոնյանը:
Լուիզա ՍՈՒՔԻԱՍՅԱՆ
