«Համազգեստով քաղաքացի». այս գաղափարը ներմուծվել է Գերմանիայում, դեռ բեռլինյան պատի փլուզումից առաջ: Դա ենթադրում է պայքար` պետության մեջ պետություն դարձող զինված ուժերի դեմ: Այդ գաղափարի կիրառումը Գերմանիայում իրեն արդարացրել է: Գերմանական այդ փորձի մասին այսօր բավական մանրամասն պատմեց ՀՀ-ում Գերմանիայի դաշնային հանրապետության արտակարգ եւ լիազոր դեսպան Մաթիաս Քիսլերը: «Հայաստանի մարտահրավերները մի քիչ այլ են, ես չէ, որ դրանք պիտի բացատրեմ»,- ասաց դեսպանը:
Գլոբալիզացիայի եւ տարածաշրջանային համագործակցության վերլուծական կենտրոնի եւ Ֆրիդրիխ Նաումանի անվան հիմնադրամի կազմակերպած`«ՆԱՏՕ-ն Վարշավայից Բրյուսել`մարդկային անվտանգության եւ անվտանգության ոլորտի բարեփոխումները Հայաստանում», թեմայով քննարկման ժամանակ դեսպանն ասաց`անցած տարի Վարշավայում կայացած գագաթաժողովը կարեւոր էր` հստակեցվեցին դիրքորոշումներն ու մոտեցումները, մասնավորաբար, ՌԴ-ի նկատմամբ. մենք ցանկանում ենք համագործակցել ՌԴ-ի հետ:
Անդրադառնալով ՆԱՏՕ-Հայաստան հարաբերություններին, դեսպանն ասաց`ՆԱՏՕ-ն խաղում է եւ կարող է ավելի կարեւոր դեր խաղալ, երբ խոսքը գնում է զինված ուժերի արդիականացման մասին. «ՆԱՏՕ-ն հուսալի գործընկեր է, ընդհանուր նպատակն է խաղաղություն եւ անվտանգություն ապահովելը: ՆԱՏՕ-ն առաջարկում է համագործակցություն, չի պարտադրում: Հայաստանի հետ մեր համագործակցությունը խիստ թափանցիկ է: ՀՀ զինված ուժերի կատարելագործման, բարեփոխման ուղղությամբ բավական աշխատանք արդեն արված է»: Դեսպանը մանրամասնեց այդ ծրագրերը`կարեւորելով հատկապես կրթական ծրագրերի իրականացումը:
Դեսպանը նաեւ նկատեց`գնահատելի կլինի, եթե այս քննարկմանը մասնակցեր նաեւ ՌԴ- դեսպանատան ներկայացուցիչը, որպեսզի հնարավոր լիներ հասկանալ ՌԴ-ի վերաբերմունքը`ՀՀ-ՆԱՏՕ համագործակցությանը: Ինքն ի կողմից հավելեց`այդ համագործակցությունը երրորդ երկրի դեմ չէ:
Նելլի ԳՐԻԳՈՐՅԱՆ
