Երեկ Երեւանում օդի ջերմաստիճանը հատեց +40-ի սահմանագիծը։ ՀՀ աշխատանքային օրենսգրքի 153-րդ հոդվածի 3-րդ կետը օդի շատ բարձր ջերմաստիճանի պարագայում նախատեսում է հատուկ ընդմիջման իրավունք։
Նշված հոդվածը սահմանում է. «Հատուկ ընդմիջումներ պետք է տրամադրվեն, եթե աշխատանքը կատարվում է պլյուս 40 աստիճան ցելսիուսից բարձր կամ մինուս 10 աստիճան ցելսիուսից ցածր օդի ջերմաստիճանային պայմաններում, ինչպես նաեւ ծանր ֆիզիկական կամ մտավոր եւ հուզական գերլարված բնույթ կրող կամ առողջության համար բացասական ներգործություն ունեցող վտանգավոր այլ պայմաններում»։
Սակայն, բարկ արեւի տակ կամ մի քիչ ստվերում բանվորներն ու արհեստավորները աշխատում էին։ Նրանց հետ զրույցից այնքան էլ հստակ չդարձավ՝ հատուկ հանգստի իրավունքից օգտվելու հնարավորություն ունենո՞ւմ են, թե՞ չէ։ Մենք մեկ դրական պատասխան էինք ստանում, մեկ էլ՝ բացասական։
Արհեստավորներն ասում էին, թե իրենց աշխատանքը գործարքային է, որքան աշխատում են, այնքան էլ վարձատրվում են, հետեւաբար շահագրգռված են շատ աշխատել, որպեսզի հնարավորինս շատ վաստակեն, որն առանց այն էլ անհամարժեք է մարդու նվազագույն կարիքներին։
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
