Կծած տեղը սրտից ներքեւ պահեք եւ անշարժացրեք
Օձերի, կենդանիների կծելու, կարիճների, սարդերի եւ միջատների խայթելու հետեւանքով օրգանիզմում առաջանում է ընդհանուր թունավորում, եւ տեղային վերք՝ կծած, խայթած տեղում, ու յուրաքանչյուր առանձին դեպք պահանջում է առանձնահատուկ մոտեցում:
Միջատների, մեղվի, իշամեղվի եւ այլ միջատների խայթելու ժամանակ առաջին օգնություն իրականացնելիս պետք է հիշեք՝
Հեռացրեք միջատին մաշկի մակերեսից:
Լվացեք խայթած տեղը:
Դրեք սառցե պարկ կամ սառը թրջոց:
Ուշադիր եղեք ալերգիկ ռեակցիայի նկատմամբ:
Եթե տուժածը գերզգայուն է խայթոցի նկատմամբ, ապա նրան տեղափոխեք մոտակա բուժհաստատություն կամ արագ ահազանգեք շտապօգնություն:
Սարդի կամ կարիճի խայթոցի ժամանակ առաջին օգնության կանոններն են՝
Լվացեք կծած, խայթած տեղը:
Դրեք սառցե պարկ կամ սառը թրջոց:
Ուշադիր եղեք եւ վերահսկեք տուժածի վիճակը առաջիկա ժամերի ընթացքում:
Օգնություն խնդրեք, ահազանգեք շտապօգնություն:
Օձերի խայթոցի ժամանակ առաջին օգնություն ցուցաբերելիս պետք է հաշվի առնել հետեւյալ կանոնները՝
Լվացեք կծած տեղը եւ սեղմեք շուրջը, որպեսզի արյունը դուրս հոսի:
Կծած տեղը սրտից ներքեւ պահեք եւ անշարժացրեք:
Հանգստացրեք տուժածին:
Հեռացրեք օղակները, սեղմող եւ ճնշող առարկաները՝ զարդեր, ժամացույց, այլ:
Խմեցրեք մեծ քանակությամբ հեղուկ՝ ջուր, հյութ, թեյ, թան, այլ:
Ուշադիր եղեք եւ վերահսկեք տուժածի վիճակը մինչեւ մասնագիտական օգնության ժամանումը կամ բուժհաստատության հասնելը:
Հնարավորինս շուտ օգնության դիմեք, ահազանգեք շտապօգնություն կամ տուժածին արագ տեղափոխեք (տուժածին պասիվ վիճակում՝ պատգարակին պառկած, աթոռին նստած, գրկած) հիվանդանոց:
Չի կարելի
Կտրել մաշկը կծածի շրջանում:
Դնել սառցե պարկ կամ սառը թրջոց:
Օգտագործել ալկոհոլային խմիչքներ:
Այրել կծած տեղը:
Արտածծել թույնը բերանով:
Տեղադրել լարաններ:
Կենդանիների եւ նույնիսկ մարդկանց կծածի ժամանակ առաջին օգնության կանոններն են՝
Լվացեք կծած տեղը:
Վերահսկեք արյունահոսությունը, դադարեցրեք այն հետեւյալ ցանկացած մատչելի եղանակով՝ վերջույթի առավելագույն ծալում, լարանի տեղադրում:
Հանգստացրեք տուժածին:
Զանգահարեք շտապօգնություն կամ խնդրեք զանգահարել որեւէ մեկին:
Մարդու կծածներից վարակվելու հավանականությունն ավելի մեծ է, քան այլ կենդանիների կծածներից, ուստի հնարավորինս շուտ դիմեք բժշկական օգնության:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
04.07.2017
