Բնապահպան Լեւոն Գալստյանն (լուսանկարում) ահազանգում է՝ ՀՀ կառավարությունը թույլատրել է ոչնչացնել մեր քաղցրահամ ջրերի գլխավոր ավազանը.
«Որը ոռոգում էր ու խմելու ջրով ապահովում Արարատյան դաշտի բնակիչներին, դրա արդյունքում երեսունից երեսունհինգ համայնք զրկվել է ոռոգման ջրից»:
Ըստ նրա, Սեւանից լրացուցիչ ջրառի նախագիծը հանցագործություն է. «Երբ մարդը հանցագործություն է թույլ տալիս, պետք է պատասխանատվություն կրի, այս մարդիկ ոչնչացրել են Սեւանից հետո երկրորդ մեծ ջրային ավազանը, ու ոչ ոք պատասխանատվության չի ենթարկվել: Հիմա աչք են դրել Սեւանի վրա, վարչապետը երեք ամիս առաջ հանձնարարական է տվել, որ Սեւանում մեկ միլիարդ խ/մ ջուր է հավաքվում ու դա պետք է տնտեսապես ճիշտ օգտագործման մեխանիզմ մշակել, չգիտեմ՝ ով է վարչապետին այդպիսի խորհուրդ տվել, բայց այդ մարդը հանցագործ է, ու եթե այդ ծրագիրն իրականացվի, դա կլինի հանցագործություն»:
«Հայաստանի անտառ» հ/կ ղեկավար Նազելի Վարդանյանն էլ հավելեց, որ այդ նախագծին դեմ են քվեարկել միայն «Ելքն» ու ՀՅԴ-ն:
«Զարմանալի է, որ «Ծառուկյան» դաշինքը կողմ քվեարկեց, չնայած հանձնաժողովի անդամներից մեկը Ծովագյուղից էր ու ամեն ինչ ասաց՝ Սեւանը կործանում ենք այդ օրենքի ընդունմամբ, բայց վերջում կողմ քվեարկեց, ինչը ինձ համար անհասկանալի էր: Հանձնաժողովի նախագահն էլ է «Ծառուկյան» դաշինքից, նա էլ ամեն ինչ ասաց՝ այս օրենքը ընդունելի չէ, հիմնավորված չէ, բայց բոլոր դեպքերում, կողմ քվեարկեց»,- ասաց Նազելի Վարդանյանը:
Արփինե ՍԻՄՈՆՅԱՆ
