Այսօր լրագրողները Կոտայքի մարզպետ Կարապետ Գուլոյանից հետաքրքրվեցին՝ ՊՆ-ի տրամադրած ցանկում բանակում չծառայածների ձեր անունը եւս կար, ի՞նչն է պատճառը, որ չեք ծառայել: Նա պատասխանեց. «Օրենքով սահմանված կարգով ես ազատվել եմ»: Նա վստահեցրեց, որ ոչ մի առողջական խնդիր չկա:
Այդ դեպքում թե ո՞րն է պատճառը, որ ազատվել է բանակից՝ Գուլոյանը առաջարկեց. «Հետաքննություն դրեք, պարզեք, ոչ մի խնդիր չկա»:
Մենք հետաքրքրվեցինք՝ վերջին համապետական ընտրությունների հետ կապված ասում են, որ դուք ՀՀԿ-ի համար էիք աշխատում եւ ոչ թե «Ծառուկյան» դաշինքի համար, ասում էին, որ դավաճանել եք ձեր աներոջը, ինչպե՞ս կարձագանքեք դրան՝ Կարապետ Գուլոյանը պատասխանեց. «Ես քաղաքական ոչ մի հարցերի չեմ պատասխանում: Ես ընդհանրապես ընտրություններին չեմ խառնվել: Ես բազմիցս լրագրողներին նշել եմ, որ ես չեմ խառնվում ընտրություններին եւ ձեզ ասեմ, իմացեք, որ անկուսակցական եմ եղել եւ անկուսակցական եմ՝ մինչեւ վերջ: Ես ոչ մեկի համար ձայն չեմ հավաքել»:
Լրագրողները հետաքրքրվեցին՝ ձեր հայրիկի Մուրադ Գուլոյանի ընկերություններից սնանկացել էր, ի՞նչ խնդիր էր եղել, երաշխավոր էր կանգնել՝ նա պատասխանեց, որ դատական գործ կա. «Դատական ատյանները քննում են, նորմալ պրոցես ա»:
Հարցին՝ ձեր հայրը հերքում էր, ասում էր, գործերը լավ են, չենք սնանկացել, հիմա սնանկացե՞լ եք՝ Կարապետ Գուլոյանը պատասխանեց. «Աստված չանի՝ մենք սնանկանանք»:
Հռիփսիմե ՋԵԲԵՋՅԱՆ
