Իրավապաշտպան Ավետիք Իշխանյանի համոզմամբ, քաղաքացիներին խոշտանգելու համար մինչեւ այժմ որեւէ ոստիկան պատասխանատվության չի ենթարկվել, քանի որ դրանից հետո լուրջ փոփոխություններ տեղի կունենան:
«Ոստիկանությունը, որպես իշխանության հենարան, կկազմալուծվի, հաջորդ անգամ եթե պետք լինի ցույցի ժամանակ ջարդեն, ոստիկանները կմտածեն՝ բա որ հանկարծ պատժվենք»,- այսօր «Հայելի» ակումբում ասաց պարոն Իշխանյանը՝ պնդելով, որ եթե այդ հարցում սխալվի, պատրաստ է ներողություն խնդրել:
ԵՊՀ Բանասիրության ֆակուլտետի դոցենտ, մասնագիտությամբ լեզվաբան Նարինե Դիլբարյանն էլ համոզված է՝ հասարակական ընդվզում պետք է լինի, ըստ նրա, եթե խաղաղ ցույցեր լինեն, ապա պատժվողներ հաստատ կլինեն, իսկ եթե ոչինչ չանենք ու բավարարվենք այդ տխուր արձանագրմամբ՝ ավելի սարսափելի բան կլինի. «Հասարակ անհնազանդության համար քեզ կպատժեն ամենաանհամաչափ ձեւով, այսինքն, ցանկացած հիմնարկում, եթե որեւէ մեկը դժգոհություն հայտնի ոստիկանապետից կամ նախագահից , նրա նկատմամբ կկիրառվեն բռնություններ տարբեր մակարդակի»:
Արփինե ՍԻՄՈՆՅԱՆ
