ՀՀ փաստաբանների պալատի փորձագիտական խումբն այսօր լրագրողների հետ հանդիպմանը ներկայացրեց վերլուծություն՝ Ադրբեջանի կողմից միջազգային իրավունքի խախտումների վերաբերյալ, որը ներառում է նաեւ նախորդ տարվա ապրիլյան ռազմական գործողությունների առնչությամբ փաստեր:
Մասնավորապես, ըստ զեկույցի, այդ ժամանակ ադրբեջանական զինված ուժերի վերահսկողության ներքո հայտնվել են ընդհանուր առմամբ 31 անձ կամ անձանց մարմիններ, որոնցից 26-ի նկատմամբ ադրբեջանական ԶՈՒ-ի կողմից կատարվել են պատերազմական հանցագործություններ:
«Ադրբեջանի վերահսկողության տակ ընկած բոլոր անձինք սպանվել են, ոմանք ենթարկվել են խոշտանգումների, իսկ դիակներն անարգվել են: Սրանք միջազգային հանցագործություններ են»,-ասաց վերլուծության հեղինակներից Արա Խզմալյանը:
Զեկույցում ամրագրված է, որ նշյալ գործողությունները կրել են կազմակերպված բնույթ. Թալիշում երեք քաղաքացիական անձի հանդեպ կատարվել է սպանություն եւ մարմինների անարգում, իսկ ծեր կնոջ նկատմամբ՝ նաեւ խոշտանգում, ինչը հաստատված է փորձագետի կողմից: «Խոշտանգումները տեղի են ունեցել անձանց ռասայական պատկանելությամբ պայմանավորված, ինչը եւս միջազգային հանցագործություն է,-նշեց Արա Խզմալյանը:
Բացի այդ, առկա է երկու զինծառայողի գլխատման դեպք, որոնցից մեկը մահացած վիճակում է եղել: Գլխատումը կատարվել է ողջ մնացած զինծառայողի ներկայությամբ: Վերջինս էլ գլխատվելիս ողջ է եղել:
Խզմալյանը տեղեկացրեց, որ նշյալ փաստերի առնչությամբ ՄԻԵԴ-ում առանձին բողոքներ կան, սակայն միջպետական իրավական գործընթաց դեռեւս չի իրականացվում. «Այդ հարթությունն իրավական եւ քաղաքական ոլորտների համադրություն է: Խոսքը պարզապես իրավական գործընթացի մասին չէ, այլ երկարատեւ քաղաքականության մասին, որի շրջանակում, եթե հանգամանքները ստեղծեն նպատակահարմար պայմաններ, կարելի է խոսել իրավական գործընթաց սկսելու մասին»:
Վերլուծության մասին մանրամասն՝ տեսանյութում:
Լուիզա ՍՈՒՔԻԱՍՅԱՆ
