«Փինք Արմենիա» կազմակերպության ներկայացուցիչներն այսօր ներկայացրին «ԼԳԲՏ անձանց մարդու իրավունքների իրավիճակը Հայաստանում. 2016թ.» զեկույցը:
Կազմակերպության ներկայացուցիչ Լուսինե Ղազարյանի ներկայացմամբ, ԼԳԲՏ համայնքի ներկայացուցիչները լուրջ խնդիրներ են ունենում հատկապես զինված ուժերում ծառայելիս. «Այն պահից, երբ բացահայտվում է նրա սեռական կողմնորոշումը, յուրաքանչյուր անձ իրավախախտումների շղթայի է հանդիպում, բռնությունների թե՛ ֆիզիկական, թե՛ հոգեբանական, արժանապատվության նվաստացում՝ թե՛ հրամանատարական կազմի, թե՛ զինվորական կազմի կողմից, անձին մեկուսացնում են մյուս զինվորներից, թույլ չեն տալիս օգտվել նույն սպասքից, ճաշել բոլորի հետ»:
«Հոդված 3» ակումբում Լուսինե Ղազարյանն ասաց, որ քրեական գործ հարուցելու դեպք էլ ունեն , երբ անձը հայտնել է, որ նույնասեռական է, քրեական գործ է հարուցվել՝ պարզելու՝ անձը խաբեության միջոցով փորձում է ազատվել զինվորական ծառայությունից. «Անհասկանալի է, քրեական գործի հարուցման պատճառը, որովհետեւ նույնասեռական լինելը զինվորական ծառայությունից ազատվելու համար հիմք չէ:
Ամենացավալի խնդիրներից մեկն էլ այն է, որ անձի նույնասեռական լինելը պարզելու համար դատաբժշկական փորձաքննություն է արվում: Դա նվաստացուցիչ վերաբերմունք է անձի նկատմամբ: Օբյեկտիվ չափանիշ չէ, նման փորձաքննություններն անցկացվում են սեռական բնույթի բռնի գործողությունները բացահայտելու համար»:
Ըստ Լուսինե Ղազարյանի՝ նույնասեռական անձինք փաստացի չեն ծառայում բանակում, թեեւ օրենքով կարգավորված չէ դա, բայց այդ կերպ հավելյալ խոցելիություն են ձեռքբերում:
Նա պատմեց, որ նույնասեռականները խնդիրներ են ունենում նաեւ տանը ու արժանանում ընտանեկան բռնությունների. «Դեպքեր ենք ունեցել, երբ բացի դասական ծեծից, ծնողները կալանքի տակ են պահել իրենց երեխաներին, տանից դուրս են հանել անչափահաս երեխաներին»:
Նրա խոսքով, սեռական կողմնորոշման պատճառով իրենց կազմակերպության մի խումբ ակտիվիստների ծեծի են ենթարկել. «Պետությունը պետք է աշխատի հասարակական կարծիքի փոփոխության ուղղությամբ, պաշտոնապես հայտնի որ ԼԳՏԲ անձանց խնդիրները, որպես խնդիր գիտակցում է, ինչը մինչեւ այժմ չենք տեսել»:
Արփինե ՍԻՄՈՆՅԱՆ
