Շաքարի մեկ ֆունտ հումքի գինը Լոնդոնի ֆոնդային բորսայում անցած տարվա դեկտեմբերին կազմել է 19.51 ցենտ։ Հիմա գինը 12.93 ցենտ է։ Այլ կերպ ասած, դեկտեմբերի համեմատ շաքարի գինը նվազել է 33 տոկոսով։ Ընդ որում, նվազել է անընդմեջ՝ ամսեամիս, օր առ օր։ Շաբոյանի ասած «գնագոյացում», «ինքնարժեք», «շահութաբերություն» ծիրին մեջ ակնհայտ է, որ շաքարը պետք է էժանանար նաեւ Հայաստանում։
Ու ի՞նչ է տեղի ունեցել։ Ըստ ՀՀ ազգային վիճակագրական ծառայության հրապարակած պաշտոնական տեղեկատվության, անցած 5 ամիսների ընթացքում, երբ աշխարհում շաքարի գինը նվազում էր, Հայաստանում աճել է: Հունվարին՝ 2016 թվականի դեկտեմբերի համեմատ, շաքարը թանկացել է 1.8 տոկոսով, փետրվարին՝ 2.9 տոկոսով, մարտին՝ 2.7 տոկոսով, ապրիլին՝ 3.2 տոկոսով, մայիսին՝ 3.3 տոկոսով։
Մի խոսքով, աշխարհում շաքարի հումքի գնի շեշտակի նվազմանը զուգընթաց Հայաստանում շաքարի գինը կայուն ու հաստատուն աճում է։ Հետաքրքիր է, թե ՏՄՊՊՀ- ն եւ նրա նախագահը տնտեսագիտական այդ ո՞ր բանաձեւով են առաջնորդվում այս աղաղակող փաստի նկատմամբ այդքան նախանձելի անտարբերություն ցուցաբերելիս։ Բա ՏՄՊՊՀ-ին չի՞ հետաքրքրում, թե ինչու է Ռուսաստանի սուպերմարկետներում շաքարի մեկ կիլոգրամը 320 դրամ, ու ոչ ոք չի ֆայմում ներկրի Հայաստան, որտեղ «մուտքի խոչընդոտ չկա» ու մեկ կիլոգրամ շաքարը 400-405 դրամ է։ Սա ի՞նչ հանելուկ է։
Հայկ ԳԵՎՈՐԳՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
