Սալորն ամենադիետիկ մրգերից մեկն է: Ապացուցված է, որ սալորը, մասնավորապես` սալորաչիրը օգնում է օրգանիզմից վնասակար խոլեստերինի հեռացմանը, այդ իսկ պատճառով այն օգտակար է հատկապես այն մարդկանց, ովքեր տառապում են հիպերտոնիայով, աթերոսկլերոզով (սրտանոթների կարծրացման հիվանդություն) եւ լեղապարկի, ռեւմատիզմ հիվանդություններով:
Սալորը պարունակում է միկրո եւ մակրոտարրեր, A, B խմբի, C, E եւ այլ վիտամիններ: Հասած սալորի մեջ ավելի շատ հանքային նյութեր կան, քան խնձորի եւ տանձի մեջ: Սալորը նաեւ մեծ քանակությամբ կալիում, ֆոսֆոր, նատրիում, կալցիում եւ պեկտին է պարունակում:
Հին հունական բժիշկների տվյալներով` քաղցր սալորի հյութն ակտիվացնում է աղիների աշխատանքը եւ վերացնում փորկապությունը: Սալորի հյութը նշանակում են երեխաներին` աճը ակտիվացնելու համար: Օգտակար միրգ է նաեւ հղի կանանց, կերակրող մայրերի, մեծահասակների համար: Այն բարերար ազդեցություն է թողնում լյարդի ու լեղուղիների բորբոքային պրոցեսների, ստամոքսի հիվանդությունների դեպքում: Խմում են 0,5-1 բաժակ` 1 ճաշի գդալ մեղրի հետ, օրը երեք անգամ, ուտելուց առաջ:
Որպես քսուք օգտագործելիս հյութին խառնում են 5 տոկոս կամֆորա` վերքերը մշակելու համար:
Սալորի բոլոր տեսակներն էլ օժտված են աղիները վնասակար մանրէներից մաքրելու հատկությամբ: Սալորի հյութը նպաստում է նատրիումի աղերից օրգանիզմն արագորեն մաքրելուն, ջրի ավելցուկի դուրսբերմանը:
Ամիրդովլաթ Ամասիացու տվյալներով` ջրի մեջ լուծված սալորենու բուսախեժը աչքի մեջ կաթեցնելիս մաքրում է աչքը, խմելու դեպքում` վերացնում է չոր հազը, կոկորդի չորությունը, մաքրում միզատար ուղիների քարերը:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
27.06.2017
