2015թ.-ին մահացած ծննդկան Մերի Մարգարյանի եւ նրա նորածնի մահվան գործով դատաքննության ժամանակ այսօր ցուցմունք տվեց մեղադրյալ Շուշանիկ Բախշյանը՝ բժիշկը, որը վարել է մահացած ծննդկանի հղիությունը:
Շուշանիկ Բախշյանի պատմելով՝ հուլիսի 24-ին Մերի Մարգարյանն իրեն հեռախոսազանգով տեղեկացրել է, որ 37 աստիճան ջերմություն ունի, բժիշկն էլ ասել է՝ արի հիվանդանոց: «Չափեցինք, ջերմություն չուներ: Անալիզներում շեղում չգտանք: Այդ պահին հոսպիտալացման որեւէ ցուցում չկար: Հուլիսի 25-ին կրկին զանգեց եւ հայտնեց, որ էլի ջերմություն ունի: Զանգեցի հիվանդանոց ու զգուշացրեցի, որ Մերին գալու է զննության: Ինձ զեկուցեցին, որ Մերին եկել է, բայց առանց հետազոտությունների պատասխանը ստանալու՝ գնացել բարեկամների հետ: Հուլիսի 26-ին ինձ զանգեցին-ասեցին, որ Մերին կրկին ջերմություն ունի, ինչից հետո նա հոսպիտալացվեց: Ողջ ընթացքում ես հեռախոսով կապի մեջ եմ եղել բժիշկների հետ»,-նշեց նա:
Հուլիսի 27-ին էլ, ըստ Շուշանիկ Բախշյանի, Մերիի մոտ հայտնաբերվել է լյարդի ֆեգմենտների բարձրացում. «Մերիի մոտ խոսքի շեղումներ կային, անհասկանալի բաներ էր ասում, տեղափոխեցինք վերակենդանացման բաժանմունք…Նյարդաբանն արյունազեղման կասկած ունեցավ»:
Խոսքն ավարտելուց Շուշանիկ Բախշյանն ասաց, որ ցավում է կատարվածի համար:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
