Մոտ 10 օր է «Վանաձոր-Քիմպրոմ»- ի ջերմաէլեկտրակայանի նախկին աշխատակիցները շուրջօրյա հերթապահություն են իրականացնում գործարանի մուտքի մոտ: Աշխատակիցները պահանջում են վճարել 2011 թվականի իրենց 4 ամսվա աշխատավարձերը եւ վերջնահաշվարկը:
-Մեր պահանջը նույնն է՝ վճարել մեր աշխատավարձերը: 2011 թվականի հուլիս-հոկտեմբեր ամիսների աշխատավարձն ու վերջնահաշվարկը: Դատարանի վճիռը կա, 130 միլիոն դրամ է կազմում մեր պարտքը: Տան իրենք մեզանից պրծնեն, մենք իրանցից- ասում է Հրաչիկ Մարտիրոսյանը:
Ջերմաէլեկտրակայանի աշխատակիցները 2012-ին դիմել էին դատարան՝ աշխատավարձերը ստանալու համար, իսկ 2014 թվականին շահել դատը: Սակայն մինչև օրս նրանց աշխատավարձը դեռ չի վճարվել:
«Մենք մինչեւ վերջ ենք գնալու, հետ չենք կանգնելու, թող իրանք իմանան: Մեր աշխատածն ենք ուզում, ուրիշ բան չենք ուզում»,- ասում է գործարանի նախկին աշխատակից Հրաչյա Գրիգորյանը:
ՋԷԿ-ի աշխատակիցները բազմաթիվ անգամներ դիմել են մարզային իշխանություններին, վարչապետներին, նախագահին: Բայց մինչ օրս իրենց աշխատավարձն են պահանջում: Գործարանը 153 աշխատողի պարտք է 130 միլիոն դրամ:
Տաթեւիկ ՂԱԶԱՐՅԱՆ
