Այսօր Վերահսկիչ պալատի նախագահ Լեւոն Յոլյանին լրագրողները հարցրեցին Վերահսկիչ պալատում կրճատումներից: Ըստ մամուլի հրապարակումների, Յոլյանը կադրային ջարդ է իրականացնում: Նա պատասխանեց, որ որոշակի կառուցվածքային փոփոխությունների անհրաժեշտություն կա, ինչից ելնելով էլ որոշ աշխատակիցներ ուղարկվել են կադրերի ռեզերվ: Յոլյանն ընդգծեց, որ նրանք օրենքով սահմանված կարգով դեռ 6 ամիս շարունակելու են ստանալ իրենց աշխատավարձերը:
Յոլյանն այսպես կադրային ռեզերվ ուղարկել է 14 աշխատակցի ու ասաց, որ եթե մի աշխատակից կա, որ դժգոհում է եւ պնդում է, թե ազատվել է աշխատանքից, կարող է գալ իր հետ զրուցելու:
Չնայած կադրերի կրճատմանը, Յոլյանն ասաց, որ նոր կադրերով ՎՊ-ն համալրելու անհրաժեշտություն ունեն:
Հաշվի առնելով ՎՊ նախկին նախագահ Իշխան Զաքարյանի «դառը» փորձը, այն, թե ինչ եղավ հետո, երբ նա մալուխը ձեռքին եկավ ԱԺ եւ սուր քննադատեց չարաշահումները, արդյոք Յոլյանը կհամարձակվի՞ նման բացահայտումներ անել ՎՊ-ի հաշվետվություններում: Ի պատասխան՝ Յոլյանն ասաց. «Ամեն ինչ էլ կարող է լինել, եկեք սպասենք հաշվետվությանը: Ես «եթե»-ներով չեմ խոսում, բացահայտումների եւ արձանագրած խախտումների մասին կխոսենք հաշվետվությունից հետո»:
Հռիփսիմե ՋԵԲԵՋՅԱՆ
