Զորակոչի ընթացքում քաղաքացիների դիմումներն ու բողոքները քննող հանձնաժողովի այսօրվա նիստին ներկայացել էր նաեւ զինակոչիկ Էդուարդ Մելքոնյանը: Նա, ըստ դիմումում նկարագրված բժշկական եզրակացության, ունի երկրորդ աստիճանի հարթաթաթություն, երկու մատների սերտաճում՝ վիրահատության կարիքով:
Զինակոչիկը ծառայության համար պիտանի է ճանաչվել, սակայն գտնում է, որ բժշկական հետազոտությունը թերի է: Էդուարդ Մելքոնյանն ասաց, որ դժվարությամբ է կոշիկ հագնում, չափազանց բարդ է հարմարավետ կոշիկ գտնելը:
Հանձնաժողովը, քննելով դիմումը, եզրակացրեց, որ բժշկական հետազոտության ակտը թերի է եւ պարզ չէ՝ զինակոչիկի քայլքի ֆունկցիան որքանո՞վ է խաթարված: Հանձնաժողովը որոշեց միջնորդել զինկոմիսարիատ՝ զինակոչիկին լրացուցիչ բուժզննության ենթարկելու համար:
Մյուս դիմումը ներկայացրել էին զինակոչիկ Վարդան Գալստյանի ծնողները, որոնք խնդրում էին միջնորդել իրականացնել կրկնակի հետազոտություն, քանի որ որդին ծնկի ցավեր ունի, աջ ծնկոսկրի անկայունություն, ֆունկցիայի խանգարում: Բացի այդ, նա պոչուկի կիստա ունի, որը թարախակալվում է: Արգիշտ Գալստյանի հայրը հարց բարձրացրեց. «Որ տղես ինվալիդ դառնա, ո՞վ է պատասխան տալու: Մյուս տղես էլ Քարվաճառում է ծառայում»: Հանձնաժողովը քննելով դիմումը որոշեց զինկոմիսարիատին ներկայացնել միջնորդություն՝ պոչուկի ուղիների բորբոքվածության առթիվ մասնագիտական ախտորոշում կայացնելու համար, որպեսզի պարզ լինի՝ վիրահատության կարիք կա՞:
Հիշեցնենք, որ քաղաքացիների դիմումների և բողոքների քննարկումը տեղի է ունենում պաշտպանության նախարարին կից հասարակական խորհրդի աշխատավայրում՝ Մոսկովյան 5 հասցեում, յուրաքանչյուր երկուշաբթի և հինգշաբթի` ժամը 10.00-ից մինչև 18.00-ն:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
