Կոմպոզիտոր Ալեքսանդր Հարությունյանի թողած ժառանգությունը ներառում է նաեւ բազմաթիվ ստեղծագործություններ փողային գործիքների համար: Ցավոք, դրանցից շատերը մինչ օրս չեն կատարվել: Իսկ, օրինակ, նրա Շեփորի կոնցերտը՝ գրված 1950թ., եղել եւ մնում է աշխարհահռչակ շեփորահարների նվագացանկում:
Կոմիտասի անվան կամերային երաժշտության տանը հունիսի 25-ին կմեկնարկի Ալ. Հարությունյանի անվան փողային գործիքների միջազգային փառատոնը: Այս մասին «Առավոտին» հայտնեց Օպերայի աջակցման հիմնադրամի տնօրեն, փառատոնի գլխավոր պրոդյուսեր Շմավոն Գրիգորյանը: Ասաց նաեւ, որ իր ձեւաչափի մեջ սա առաջին փողային փառատոնն է, որը 5 օր իր շուրջը միավորելու է հայ եւ այլազգի կատարողների: (Հրավիրված է 13 երկրից 28 երաժիշտ): Հավելեց նաեւ, թե այս միջոցառմանն աջակցում են կոմպոզիտորի ընտանիքը, ՀՀ մշակույթի նախարարությունը եւ Երեւանի քաղաքապետարանը: Փառատոնի գեղարվեստական ղեկավարն ու դիրիժորը Կարեն Դուրգարյանն է, միջոցառումն իրականացվում է Վահան Մարտիրոսյանի ղեկավարությամբ՝ Հայաստանի պետական կամերային նվագախմբի հետ համատեղ:
Հարությունյանական փառատոնի մասնակիցները:
«Առավոտի» հետ հանդիպման ժամանակ կոմպոզիտոր Ալեքսանդր Հարությունյանի դուստրը՝ Նարինե Կուտչուկյանը (լուսանկարում), հիշեցրեց, որ հայրը մեկն է աշխարհի այն եզակի կոմպոզիտորներից, որ գրել է թվով 9 կոնցերտ փողայինների համար, ինչպես նաեւ տրիո, կվարտետներ, կվինտետներ եւ քայլերգեր փողային նվագախմբի համար:
«Փառատոնի նպատակը միայն հայտնի կոմպոզիտորների, այդ թվում՝ նաեւ հորս ստեղծագործությունների կատարումը չէ, այլ երաժիշտների շփումը, փորձի եւ գաղափարների փոխանակումը: Մի կարեւոր հանգամանք՝ առաջին անգամ կազմակերպվող փառատոնը միտված է Հայաստանում զարգացնել փողային երաժշտական դպրոցը, հնարավորություն ընձեռել երաժիշտներին վարպետության դասեր ստանալ բարձրակարգ մասնագետներից: Գերմանիայից եւ Սերբիայից հրավիրված փողային գործիքներ վերանորոգող վարպետներն էլ, իբրեւ աջակցություն, անվճար կնորոգեն հայաստանցի երաժիշտների գործիքները, ինչի անհրաժեշտությունը վաղուց կա»,- ասաց տիկին Կուտչուկյանը:
Դիտարկմանը, թե տարօրինակ է լսել, որ Ալեքսանդր Հարությունյանն ունի չկատարված գործեր, դուստրը պատասխանեց. «Իհարկե, դժվար է պատկերացնել, բայց այդպես է…»:
Անդրադառնալով կայանալիք փառատոնին, Նարինե Կուտչուկյանը հույս հայտնեց, որ այն կդառնա ամենաամյա եւ շտապեց հայտնել, թե եկող տարի իր մասնակցությամբ փառատոնը կպատվի աշխարհահռչակ շեփորահար, կուբացի Արթուրո Սանդովալը:
Ի դեպ, նման փառատոն տարածաշրջանում առաջին անգամ անցկացվել է Թբիլիսիում՝ 2013թ.:
ՍԱՄՎԵԼ ԴԱՆԻԵԼՅԱՆ
«Առավոտ օրաթերթ»
23.06.2017
