«Սասնա ծռերի» պահանջները հեղհեղուկ էին: Մի կողմից ասվում էր, որ արցախյան ճակատում դավաճանական գործընթացներ են գնում, մյուս կողմից էլ, թե ինչի է հասցրել իշխանության քաղաքականությունը»,-«Հոդված 3» մամուլի ակումբում այսօր կազմակերպված «Հուլիսյան ճգնաժամից մեկ տարի անց. ապստամբության իրավունքի և բռնության սահմանները» քննարկման ժամանակ այսպիսի կարծիք հայտնեց իրավագետ Արտաշես Խալաթյանը:
Նրա խոսքով՝ հստակ չէր, թե «Սասնա ծռերն» ինչ պահանջներ էին առաջադրում. «Ապստամբությունը քաղաքական դասի արմատական փոփոխություն է ենթադրում, որը գաղափարական հենք պետք է ունենա: Ապստամբություն ձեռնարկողն էլ լեգիտիմություն պետք է ունենա հասարակության շրջանում»:
Քաղաքացիական ակտիվիստ Վահե Գեւորգյանն էլ իր հերթին համոզմունք հայտնեց՝ քաղաքացին կարող է մասնակցել զինված գործողության, կամ ոչ, բայց իրավունք չունի մեղադրել նման գործողության դիմածներին. «Իշխանության վրա իրավական ազդեցության լծակներ չկան, իշխանությունները Մարտի 1-ի սպանվածների գնով են եկել իշխանության: Այլ ճանապարհ չի մնում, քան տեսանք այն, ինչ եղավ մեկ տարի առաջ՝ հուլիսին»:
Քաղաքագետ Արա Պապյանն էլ իշխանություններին կոչ հղեց. «Մի ստեղծեք ձեր համար խնդիրներ, ժողովրդին վերադարձրեք իշխանությունը, այլապես արտագաղթը կահագնանա: Հիշեք՝ հուլիսյան դեպքերի ժամանակ BBC-ի հարցախույզը երեւանյան փողոցներում. նրանք չկարողացան մեկ հոգու գտնել, որը կդատապարտեր երեւույթը: Դա դիտվեց որպես ճարահատյալ քայլ»:
Այլ մանրամասները՝ տեսանյութում
Լուիզա ՍՈՒՔԻԱՍՅԱՆ
