«Ինձ զեկուցեցին, որ Արթիկ քաղաքում գիշերը վթարվել է բնակելի շենք: Պարոն Լոքյան, կարո՞ղ եք մեզ ինֆորմացիա փոխանցել»,- կառավարության այսօրվա նիստի սկզբում անդրադառնալով Արթիկում գիշերը բնակելի շենքի պատի փլուզմանը՝ ասաց վարչապետը:
Տարածքային կառավարման և զարգացման նախարար Դավիթ Լոքյանն իրազեկեց, որ բնակելի շենքը վթարվել է, տեղի է ունեցել քարաթափություն, կան ճաքեր՝ ներքևից վերև: Վթարված շենքից բնակիչները տարհանվել են: «Հիմա իրենք ապրում են այլ տարածքներում, ես կխնդրեի, որ արագ ուսումնասիրություն իրականացվի և լուծում տրվի այն ընտանիքների խնդրին, ովքեր մնացել են դրսում»,- ասաց նախարարը:
Արտակարգ իրավիճակների նախարար Դավիթ Տոնոյանն էլ ասաց, որ տարհանելուց հետո 11 ընտանիք վերադարձել է: «Դա չի վերահսկվել մեր կողմից, չեմ կարծում, որ վերադարձը ճիշտ էր: Շենքը վթարային է»,- ասաց Տոնոյանը:
Վարչապետը հանձնարարեց կառավարության նիստից հետո հարցը քննարկել միասին, որպեսզի լուծումներ տան:
Նշենք, որ Արտակարգ իրավիճակների նախարարության հաղորդագրության համաձայն՝ «Հունիսի 22-ին, ժամը 23:55-ին ահազանգ է ստացվել, որ Շիրակի մարզի Արթիկ քաղաքի Սասունցի Դավթի փողոցի թիվ 13 շենքի արտաքին պատը փլուզվել է. անհրաժեշտ է փրկարարների օգնությունը: Դեպքի վայր է մեկնել մեկ մարտական հաշվարկ:
Պարզվել է, որ թիվ 13 շենքի (կառուցված 1986 թ.) արևմտյան մասի ստորին հատվածում տեղի է ունեցել քարաթափում (մոտ 4 քմ), և արտաքին հատվածում առկա են մինչև 2 սմ հաստությամբ և մոտ 13 մ երկարությամբ ճաքեր. առկա է շինության փլուզման վտանգ։
Մինչ փրկարարների՝ կանչի վայր հասնելը շենքի վտանգավոր հատվածից տարհանվել են թվով 20 բնակիչ, ևս 11 բնակիչ (4 անչափահաս) շարունակում են գտնվել շենքի անվտանգ հատվածում: Տուժածներ չկան:
Փրկարարները սահմանազատել են վտանգավոր հատվածը, ապահովել տարածքի լուսավորությունը և չտարհանված բնակիչների հետ տարել բացատրական աշխատանքներ:
Դեպքի վայրում են գտնվել Շիրակի մարզպետ Ա. Խ.-ը, Արթիկ քաղաքի քաղաքապետ Մ. Վ.-ը, էլ. ցանցի, 1-04 ծառայության, ԱԱԾ, ոստիկանության Արթիկի բաժնի, մարզպետարանի և քաղաքապետարանի աշխատակիցներ»:
Նելլի ԲԱԲԱՅԱՆ
