Ինչպես ավելի վաղ հայտնել էինք, ոստիկանության ՊՊԾ գունդը գրաված «Սասնա ծռեր» զինված խմբի գործով դատավարության ընթացքում այսօր ամբաստանյալներից Գագիկ Եղիազարյանի փաստաբան Տիգրան Եգորյանը առանց դատավորին նախազգուշացնելու հեռացել էր նիստերի դահլիճից, պատճառաբանելով, որ առանց իր պաշտպանյալի նպատակահարմար չի գտնում մասնակցել նիստերին:
Քիչ առաջ դատավոր Արտուշ Գաբրիելյանը հրապարակեց որոշումը, համաձայն որի՝ փաստաբան Տիգրան Եգորյանը պետք է ենթարկվի պատասխանատվության՝ ՀՀ փաստաբանների պալատի կողմից:
Այնուհետեւ տեղից խոսելու համար դատական նիստերի դահլիճից հեռացվեց ամբաստանյալներից Վարուժան Ավետիսյանը: Նա բացականչել էր. «Ես ապստամբության կոչ եմ անում, ժողովուրդ ջան, զենք վերցրեք Սերժիկին ու իր բանդան ֆիզիկապես ոչնչացրեք»:
Այս միջադեպը կրկին առաջացրեց «Սասնա ծռերի» հարազատների եւ համակիրների դժգոհությունը: Նիստը՝ արդեն չորրորդ անգամ, հետաձգվեց 1 ժամով:
Վարուժան Ավետիսյանի շահերի պաշտպան, փաստաբան Մուշեղ Շուշանյանը լրագրողների հետ զրույցում ասաց, որ առանց իր պաշտպանյալի ինքը չի մասնակցելու նիստերին: Նաեւ նշեց, որ իր ենթադրությամբ՝ դատավորը որոշակի ցուցումներ եւ հրամաններ ստանալու կարիք ունի, այդ պատճառով էլ անընդհատ ընդմիջում է նիստը:
Լուիզա ՍՈՒՔԻԱՍՅԱՆ
