«Մարմնի կինոյի» վարպետի ֆիլմը երեւանյան պրեմիերա կունենա

«Ոսկե ծիրան» 14-րդ միջազգային երեւանյան փառատոնի շրջանակում ի թիվս այլ ֆիլմերի, կկայանա ֆրանսիացի կինոռեժիսոր, պրոդյուսեր եւ սցենարիստ Ֆրանսուա Օզոնի «Երկդիմի սիրեկանը» ֆիլմի երեւանյան պրեմիերան:

Ռեժիսորի էրոտիկ թրիլերը պատմում է Քլոե անունով կնոջ մասին, որը սիրահարվում է իր հոգեվերլուծող Փոլին: Որոշ ժամանակ անց Քլոեն տեղափոխվում է սիրած մարդու մոտ, սակայն ամիսներ անց նա պարզում է, որ Փոլն իր անձնական կյանքից բավական բան է թաքցնում, ինչն ուղղակի մղձավանջի է վերածում նրանց համատեղ կյանքը:

Ֆիլմում նկարահանվել է նաեւ եվրոպական կինոյի լեգենդ Ժակլին Բիսեթը, որն անցյալ տարի «Ոսկե ծիրանի» գլխավոր հյուրն էր:

Օզոնին համաշխարհային ճանաչում են բերել հատկապես «Լողավազան» եւ «8 կանայք» ֆիլմերը: Այս ռեժիսորի աշխատանքները աչքի են ընկնում ընդգծված սատիրայով եւ մարդկային սեքսուալության վերաբերյալ ազատ հայացքներով: Օզոնի անունը կապված է ֆրանսիական կինոյի «Նոր ալիքի» հետ, նա այն կինոռեժիսորներից է, որոնց արվեստը քննարկում են այսպես կոչված «մարմնի կինոյի» համատեքստում:

Պատրաստեց Գոհար ՀԱԿՈԲՅԱՆԸ