Լեռնային Ղարաբաղի պաշտպանության բանակի նախկին հրամանատար Սամվել Բաբայանը առաջիկա շաբաթներին արդեն կարող է կանգնել դատարանի առջև։ «Իգլայի» աղմկահարույց գործով նախաքննությունն ավարտվել է:
Մոտ երեք ամիս կալանավորված Սամվել Բաբայանին առաջադրված մեղադրանքները փոփոխվել են։ Ինչպես «Ազատությանը» տեղեկացրեց Բաբայանի փաստաբան Ավետիս Քալաշյանը, Արցախի հերոսն այժմ մեղադրվում է զենքի ապօրինի շրջանառության և փողերի լվացման մեջ: Հանվել է մաքսանենգության հոդվածը, ինչը, փաստաբանի պարզաբանմամբ, նշանակում է, որ Բաբայանը կապ չունի զենքի ապօրինի ներկրման հետ:
Գործի նյութերն արդեն տրամադրվել են կողմերին, դրանց ծանոթանալու համար Բաբայանն ու նրա փաստաբանը տասն օր ժամանակ են խնդրել։ Մեղադրանքի փոփոխությունից հետո, Սամվել Բաբայանին այժմ առավելագույնը 13 տարվա փոխարեն սպառնում է 11 տարվա ազատազրկում։ Ըստ փաստաբանի, ԼՂ նախկին հրամանատարը չի ընդունում իրեն առաջադրված մեղադրանքը։
Հիշեցնենք՝ Սամվել Բաբայանը ընդդիմադիր «Օհանյան-Րաֆֆի-Օսկանյան» դաշինքի համակիր էր և ձերբակալվել էր մարտի 22-ին, խորհրդարանական ընտրություններից օրեր առաջ:
