«Ի՞նչ է նշանակում 8 միլիարդ ԱՄՆ դոլարի ներդրում ՀՀ էներգետիկ համակարգում: Սա նշանակում է կամ առկա բոլոր ենթակառուցվածքների գնում եւ դրա հիմքի վրա նոր էներգետիկ համակարգի ձեւավորում, կամ էլ ՀՀ Կառավարության պարտավորություն` վերացնել օրենքներով եւ միջազգային պայմանագրերով ստեղծված մենաշնորհները բնական գազի եւ էլեկտրոէներգիայի բաշխման ոլորտում: Սա իր հերթին նշանակում է, որ եթե Հայաստանի իշխանությունը ընդառաջ գնա այս առաջարկությանը եւ ընդունի հավասար, մրցակցային պայմաններ ստեղծելու ԱՄՆ նախապայմանը, ապա չի բացառվում, որ շուտով կունենանք երկրորդ գազաբաշխիչ եւ էներգաբաշխիչ համակարգ` զինված նորագույն տեխնոլոգիաներով եւ էներգակիրների ձեռք բերման աղբյուրի լիակատար ազատությամբ», «Առավոտ»-ին տված հարցազրույցում նշեց Եվրոպական ուսումնասիրությունների կենտրոնի ղեկավար Արթուր Ղազինյանը` մեկնաբանելով անցյալ ամիս Հայաստանում ԱՄՆ դեսպան Ռիչարդ Միլսի` ՀՀ էներգետիկայի բնագավառում 8 միլիարդ դոլարի ներդրումային հեռանկարի վերաբերյալ հայտարարությանը:
Մեր զրուցակիցն այնուհետեւ պարզաբանեց. «Այլ կերպ ասած, Հայաստանի բնակիչը հնարավորություն կունենա ընտրել, թե որ էլեկտրոէներգիա կամ գազ մատակարարող ընկերությունից գնել գազն ու հոսանքը, ինչը, իմ խորին համոզմամբ, շուկայական տնտեսության հիմնաքարերից է եւ պետք է առկա լինի ցանկացած մրցակցային տնտեսության մեջ: ԱՄՆ մասնավոր էներգետիկ ընկերությունների կողմից 8 միլիարդի ներդրումի պարագայում Հայաստանը կդառնա տարածաշրջանի էներգետիկ առաջատար`գերազանցելով Ադրբեջանի արդեն սպառվող նավթի եւ խնդրահարույց գազի պաշարների առկայությամբ: Այս հանգամանքը արդեն խնդիրը զուտ տնտեսականից տեղափոխում է անվտանգության ոլորտ, որտեղ Հայաստանը ամբողջովին կախված է Ռուսաստանից: Փաստացի կարող ենք ասել, որ ԱՄՆ առաջարկել է ետ գնել վաճառված ինքնիշխանությունը եւ Հայաստանը դարձնել ժամանակակից պետություն»:
Եվրոպական ուսումնասիրությունների կենտրոնի ղեկավար Արթուր Ղազինյանի հետ հարցազրույցն ամբողջությամբ` կարդացեք հունիսի 21-ի տպագիր «Առավոտ»-ում:
ԷՄՄԱ ԳԱԲՐԻԵԼՅԱՆ
Լուսանկարը` Արթուր Ղազինյանի ֆեյսբուքյան էջից:
