«Ատոմային էներգետիկան ամեն երկրի տնտեսությանը, որը կանգնում է այդ ճանապարհին, թույլ է տալիս դինամիկ զարգանալ: Այն համաշխարհային տնտեսության մեջ հսկայական դերակատարում ունի, բայց կարեւոր է դրա անվտանգ զարգացումը»,-«Ատոմէքսպո 2017» համաժողովում ասաց «Ռոսատոմ» կորպորացիայի խորհրդի նախագահ Սերգեյ Կիրիենկոն:
9-րդ միջազգային համաժողովն անցնում է Մոսկվայում, որին մասնակցում է 600 ընկերություն՝ 62 երկրներից, ընդհանուր առմամբ՝ 5000 մարդ:
Ըստ Սերգեյ Կիրիենկոյի, միջուկային էներգետիկան բժշկության, գյուղատնտեսության, մեքենաշինության, տրանսպորտի, բնական պաշարների եւ շատ այլ ոլորտներում իր նշանակալի դերակատարությունն ունի: Ըստ նրա, ամեն տարի այս համաժողովին հավաքվում են ոչ միայն ատոմային շուկայի փորձառու մասնակիցներ, այլեւ, ամեն անգամ ավելանում են երկրներ, որոնք նախապատվությունը տալիս են միջուկային էներգետիկայի զարգացմանը: Հենց սա էլ ատոմային էներգետիկայի զարգացման երաշխիքն է: Ամենակարեւորը կանաչ տնտեսության շարժումն է առանց ածխածնի էներգիայի:
Իր ելույթում պարոն Կիրիենկոն ասաց, որ այս հարցերում կարեւոր դեր է խաղացել Փարիզյան կլիմայական համաձայնագիրը, որը հնարավորությունների պատուհան է բացել:
Նրա՝ մինչեւ 2050 թվականը համաշխարհային էներգետիկ հաշվեկշռում մաքուր էներգիան պետք է ավելանա 30-80 %-ով:
Պարոն Կիրիենկոն նաեւ ասաց, որ ատոմային հզորությունները սկսել են ակտիվ զարգացնել Հնդկաստանը եւ Չինաստանը: Նա նաեւ գոհունակություն հայտնեց, որ շատ երկրներում այդ ոլորտում օգտագործվում են ռուսական տեխնոլոգիաները:
Լուսինե ԲՈՒԴԱՂՅԱՆ
