Արա Խաչատրյանը բռնության է ենթարկել կնոջը՝ Նաիրա Սմբատյանին, սակայն դատարանը քրեական գործ հարուցելու համար հանցակազմ չի տեսնում:
«Մեդիա կենտրոնում» հրավիրված քննարկմանը Նաիրա Սմբատյանի փաստաբան Ստեփան Ոսկանյանն անհիմն որոշում համարեց այն, որ ծեծի վերաբերյալ քրեական հետապնդումը դադարեցվել է և քրեական գործի վարույթը կասեցվել՝ մեղավոր անձի անհայտ լինելու հիմքով:
Փաստաբանը պատմեց, որ Նաիրա Սմբատյանը պարբերաբար իր ամուսնու՝ Արա Խաչատրյանի կողմից հոգեբանական և ֆիզիկական ճնշումների է ենթարկվել։ Փաստաբանի խոսքով՝ նրանց աղջիկները գտնվել են հոր և նրա ծնողների ազդեցության տակ, և հորը գոհացնելու համար պարբերաբար ծաղրի են ենթարկել մորը։ Նշենք, որ Նաիրա Սմբատյանն ու Արամ Խաչատրյանն ունեն 4 երեխա, որոնցից ամենափոքրը՝ 3 տարեկան որդին, այժմ մոր հետ ապրում է Սմբատյանին իրավաբանական աջակցություն տրամադրող «Կանանց աջակցման կենտրոն» ՀԿ-ի գաղտնի ապաստարաններից մեկում։ 3 աղջիկները, որոնցից ամենամեծը 15 տարեկան է, գտնվում են հոր խնամակալության տակ։
Ստեփան Ոսկանյանը նշեց, որ հունվարի 4-ին Նաիրա Սմբատյանը ծեծի է ենթարկվել. «Ամուսինը նրան խփել է ոտքերով, և երբ Նաիրան ցանկացել է վերցնել 3 տարեկան որդուն և փախչել, աղջիկներն ընդդիմացել են: Նաիրան բառի բուն իմաստով փախել է տնից՝ անգամ առաջին անհրաժեշտության իրեր չվերցնելով»:
Փաստաբանը նաև տեղեկացրեց, որ դիմել են գլխավոր դատախազին և կրկին մերժում են ստացել:
Պարոն Ոսկանյանը պատմեց նաև, որ երբ Նաիրան գտնվել է իր ծնողների բնակարանում, Արա Խաչատրյանն աղջիկների հետ միասին եկել է, փչացրել այդ տան դուռը, սոսնձել այն, տարբեր նյութեր փչել վրան:
Փաստաբանը տեղեկացրեց, որ իրենք վիճարկում են դատական որոշումների օրիկնականության հարցը: Այս պահի դրությամբ իրենց միայն հաջողվել է հասնել նրան, որ գործով շահագրգիռ անձինք՝ Նաիրա Գալստյանն ու Արա Խաչատրյանը, ցուցմունք տան. նիստը տեղի կունենա օգոստոսին:
Նաիրա Սմբատյանի փաստաբան Նոնա Գալստյանն էլ տեղեկացրեց, որ իրենք երեխաների բնակության վայրի հետ կապված պահանջ են ներկայացրել դատարան: Այնուհետև մտահոգություն հայտնեց. «Ցավոք ՀՀ-ում չկա որևէ պատկան մարմին, որը կկարողանա նման իրավիճակներում պաշտպանել երեխաների անվտանգությունը, մինչև դատական որոշման առկայությունը: Նաիրան դիմել է խնամակալության մարմինների, ՄԻՊ, քաղաքապետարան,ոստիկանություն՝ ահազանգելով այն մասին, որ երեխաները գտնվում են հոր կողմից հոգեբանական ճնշումների ներքո, դուրս են մնում կրթությունից: Սակայն խնդրին լուծում չի տրվել: Մի կողմից ոստիկանությունը պատճառաբանում է, թե իրենց լիազորությունների մեջ չի մտնում երեխաների հետ տեսակցություն կազմակերպելը, բայց մյուս կողմից, երբ Արա Խաչատրյանն է դիմում, չգիտես ինչու ձեռնամուխ են լինում այդ խնդրանքի իրականացմանը»:
Տիկին Գալստյանը նշեց, որ հաջորդ դատական նիստը նշանակված է հունիսի 22-ին, որի ընթացքում քննարկվելու է միջնորդությունը դատահոգեբանական փորձաքննություն իրականացնել երեխաների շրջանում, որ մասնագետները հիմնավորինս ուսումնասիրեն և տան տվյալներ, թե նրանց հոգեվիճակի վրա ինչպես են ազդում ծնողների վեճերը:
Ընդդեմ կանանց նկատմամբ բռնության կոալիցիայի համակարգող, իրավապաշտպան Զառա Հովհաննիսյանի համոզմամբ՝ տարբեր լծակներով ճնշումներ են գործադրվում պատկան մարմինների վրա, իսկ նման վարքագիծը կոնկրետ քաղաքականության արդյունք է համարում:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
