ԵԱՀԿ Մինսկի խումբը հույս ունի, որ Հայաստանն ու Ադրբեջանը կշարունակեն երկխոսությունը Արցախի շուրջ: Ինչպես հաղորդում է ԱՊԱ-ն, այս մասին հայտարարել է ԵԱՀԿ Մինսկի խմբի ռուսաստանցի համանախագահ Իգոր Պոպովը:
«Եվ Բաքվում, և՛ Երևանում մենք քննարկումներ ենք անցկացրել քաղաքական երկխոսության վերականգնման շուրջ: Այդ քննարկումների արդյունքում կարելի է գալ եզրակացության, որ երկու երկրների նախագահներն էլ հանդես են գալիս խաղաղ բանակցությունների շարունակման օգտին»,- ասել է դիվանագետը:
Պոպովը նաև նշել է, որ համանախագահները խորը ափսոսանքի զգացողություն ունեն՝ կապված շփման գծում վերջին իրադարձությունների հետ: Նրա խոսքով՝ այդ հարցը ինքը քննարկել է Ադրբեջանի նախագահի և պաշտպանության նախարարի հետ:
«Մենք շատ ենք ցավում տարածաշրջան համանախագահների այցի նախօրեին հրադադարի ռեժիմի լուրջ խախտման կապակցությամբ: Մենք պետք է մեր ուժերի սահմաններում ամեն ինչ անենք, որպեսզի նման իրադարձությունները չկրկնվեն: Մենք մեզնից կախված ամեն բան կանենք՝ լարվածությունը թուլացնելու համար»,- ասել է Պոպովը:
Հիշեցնենք, վերջին օրերին շփման գծում ադրբեջանական հերթական սադրանքի հետևանքով հայկական կողմը կրել է 4 զոհ:
Պատրաստեց՝ Վիկտորյա ԱՆԴՐԵԱՍՅԱՆԸ
