«Բլից ինֆո» մամուլի ակումբում այսօր գրականագետ Դավիթ Գասպարյանն անդրադարձավ Շառլ Ազնավուրի այն կարծիքին, թե ինքը կամենում է Ժորժ Կառվարենցի «Քեզ համար, Հայաստան» երգը տեսնել որպես Հայաստանի Հանրապետության օրհներգ:
«ՀՀ օրհներգին ընտելացել ենք, եթե փոխելու ենք՝ պետք է լուրջ քննարկում լինի»,-նկատեց Դավիթ Գասպարյանը:
Ապա առաջարկեց որպես ՀՀ օրհներգ ընդունել պոլսեցի երգահան Գաբրիել Երանյանի «Առ Հայաստան» երգը՝ գրված Հովվան Վանանդեցու բանաստեղծության հիման վրա:
«Նրան են պատկանում հայտնի «Կիլիկիա», «Արիք Հայկազունք» երգերը: Նա այնքան երեւելի երաժիշտ էր, որ Պոլսում երաժշտական մամուլ էր հրատարակում՝ «Հայկական քնար» անվամբ»,-նշեց Դավիթ Գասպարյանը:
Նրա խոսքով՝ որպես ՀՀ օրհներգ կարելի է ընդունել նաեւ Չարենցի «Ես իմ անուշ Հայաստանի»-ն, որի համար երաժշտություն է գրել Տիգրան Մանսուրյանը: «Մանսուրյանին շատ հավանում եմ, բայց այդ երաժշտությունն օրհներգային չէ»,-կարծիք հայտնեց Դավիթ Գասպարյանը:
Լուիզա ՍՈՒՔԻԱՍՅԱՆ
