Տարեցտարի մեծանում է միգրացիոն գործընթացներում ՀՀ քաղաքացիների ներգրավվածության թիվը: ՀՀ-ից որպես աշխատանքային միգրանտներ մեկնում են 18-54 տարեկանները, որոնցից 77%-ը՝ տղամարդիկ: Այս մասին այսօր լրագրողների հետ հանդիպմանը տեղեկացրեց «Վերադարձ և պաշտպանություն» սոցիալ-իրավական ՀԿ նախագահ Տաթևիկ Բեժանյանը:
Նրա փոխանցմամբ՝ պետպատվերով արված վերջին հետազոտություններով՝ մինչեւ 2015 թվականը երկարաժամկետ աշխատանքային միգրանտների թիվը կազմում էր տարեկան 35 000, որի հիսուն տոկոսը մշտական միգրանտներն էին. «2016թ.-ին հայ միգրանտների 95%-ը ՌԴ-ում է աշխատել, որի տնտեսության վատթարացման հետեւանքով է միգրացիան փոքր-ինչ նվազել: Մի մասը վերադառնում էր, որովհետեւ չէր կարողանում նախորդ տարիների գումարը վաստակել, մի մասն էլ այլեւս չմեկնեց»:
Փորձագետը նշեց՝ մտավախություն ունեն, որ 90-ականների սկզբի ուղեղների արտահոսքը կկրկնվի. «Հիմա ունենք սեռերի հարաբերակցության խաթարում, ծերացման երեւույթի արագացում, նոր սերնդի սոցիալացման եւ տարեցների ապահովության հարցեր»:
Տաթևիկ Բեժանյանը նաեւ նշեց, որ 2017թ միգրացիայի վերաբերյալ արդյունքները հրապարակվեն այս տարի:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
