ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը հունիսի 16-ին այցելեց «Հյուսիս-հարավ ճանապարհային միջանցքի» Տրանշ 3-ի` Թալին-Լանջիկ և Լանջիկ-Գյումրի ճանապարհահատվածներ: Այստեղ ճանապարհաշինական աշխատանքները կատարում է չինական «Սինոհիդրո Քորփորեյշն» ընկերությունը:
Նախարարն իր նախորդ այցերի ընթացքում ընկերության աշխատանքում թերացումներ էր արձանագրել և հանձնարարել, որ դրանք շուտափույթ վերացվեն: Այս անգամ Վահան Մարտիրոսյանը նկատեց, որ շինարարական աշխատանքներում բավական առաջընթաց է գրանցվել թե՛ շինարարության ընթացքի և թե՛ ներգրավված տեխնիկայի առումով, սակայն կատարվող աշխատանքի որակը դեռևս գոհացուցիչ չէ:
Տեխնիկական վերահսկողություն իրականացնող ինժեներները նախարարին հայտնեցին, որ արդեն պատրաստ ջրթող խողովակներից երկուսն առանց լաբորատոր վերահսկողության են կառուցվել, հիմա սխալը շտկվում է։ Վերցվել են նմուշները և կատարվելու է լաբորատոր հետազոտություն` ստուգելու համար դրանց որակական համապատասխանությունը պահանջվող չափանիշներին։
Վահան Մարտիրոսյանը հանձնարարեց խիստ վերահսկողությամբ իրականացնել ստուգումները, և թերություններ արձանագրելու դեպքում ճանապարհաշինական ընկերությանը պարտադրել վերացնել դրանք։
Նախարարը նշեց, որ բետոնապատումից առաջ պետք է հեռացվի և հետագա օգտագործման նպատակով պահեստավորվի ճանապարհի ամբողջ սևահողը:
Բետոնապատման ժամանակակից տեխնիկան շինհրապարակում է։ Գերմանիայից Հայաստան ժամանած ինժեներների առջև խնդիր է դրված այն շահագործել այնպես, որ անհրաժեշտ որակի բետոնե ծածկ ստանան: Նախարարը նշեց, որ ընկերությանն անհրաժեշտ է վերանայել ինժեներ- մասնագետների իր անձնակազմը, նկատելով, որ բետոնե շերտը դեռևս որակյալ չէ, և գերմանացի մասնագետները պետք է մնան այնքան ժամանակ, մինչև կստանան պահանջվող չափորոշիչներին համապատասխանող ճանապարհածածկ:
Հայաստանում Չինաստանի Ժողովրդական Հանրապետության արտակարգ և լիազոր դեսպան Թիան Էրլունը, ով նույնպես ուղեկցում էր նախարարին, վստահեցրեց, որ անձամբ կհետևի, որ չինական ընկերությունը արդարացնի իր վրա դրված պատասխանատվությունը:
Աշխատանքային խորհրդակցությունը շարունակվեց «Սինոհիդրո» ընկերության գրասենյակում, որտեղ առավել մանրամասն քննարկվեցին շինարարության կազմակերպման բոլոր առանձնահատկությունները:
Կողմերն արտահայտեցին իրենց տեսակետները: Վահան Մարտիրոսյանը ձևակերպեց նախարարության` որպես պատվիրատուի, դիրքորոշումը. 2 շաբաթ ժամանակ է տրվում ընկերությանը, որպեսզի բոլոր թերացումները վերացնի, արագացնի աշխատանքի ընթացքը, ինժեներական որակյալ ռեսուրսներով համալրի անձնակազմը, լիարժեք շահագործման հանձնի որակի վերահսկողության լաբորատորիան: Հակառակ դեպքում՝ պատվիրատուի կողմից ընկերության հանդեպ կկիրառվեն տույժեր ու տուգանքներ։
«Մինչև այս ամսվա ավարտը շահագործման պիտի հանձնվեն փաստաթղթերի պահանջներին համապատասխանող լաբորատորիաներ։ Մինչ այդ պետք է կատարվեն միայն հողային աշխատանքներ, բետոնե ծածկն առանց այդ լաբորատորիաների չի ընդունվելու»։
Նախարարը շեշտեց, որ վերահսկողությունն այս դեպքում ամենօրյա հաշվետվողականությունն է, որպեսզի կատարված յուրաքանչյուր աշխատանք փաստաթղթավորվի, իսկ թերացումներին արագ արձագանք տրվի:
Այլ մանրամասներ՝ տեսանյութում…
ՀՀ տրանսպորտի, կապի և տեղեկատվական տեխնոլոգիաների նախարարություն
