Փորձագետ Կարեն Վարդանյանի (լուսանկարում) սպանության գոծով դատական նիստն այսօր հետաձգվեց ամբաստանյալ Արթուր Միհրանյանի ինքնազգացողության վատանալու պատճառով: Դատարանի որոշմամբ, նրա համար շտապ օգնություն են հրավիրել, նիստը հետաձգվել է կես ժամով:
Այսօր դատարան չէր ներկայացել գործով վկա Մանուկ Ստեփանյանը, դատարանի որոշմամբ, հաջորդ դատական նիստին նրան բերման կենթարկեն:
Դատարանի մեկ այլ որոշմամբ, փոխվեց գործով ապացույցների հետազոտության հաջորդականությունը: Դատավարության կողմերը չառարկեցին դատարանի առաջարկը:
Ըստ այդ որոշման՝դատարանը նախ կլսի վկաներին, հետո ամբաստանյալներին:
Հիշեցնենք, որ ըստ մեղադրական եզրակացության, Գևորգ Զոհրաբյանն ու Արթուր Միհրանյանը, նախնական համաձայնությամբ, խմբի կազմում վստահությունը չարաշահելու և խաբեության միջոցով գաղտնի առևանգել են Կարեն Վարդանյանին, այնուհետև խմբի կազմում շահադիտական դրդումներով դիտավորությամբ ապօրինաբար զրկել կյանքից, որից հետո, նախնական համաձայնությամբ, խմբի կազմում գաղտնի հափշտակել են Կարեն Վարդանյանի զգալի չափի գույքը:
Արփինե ՍԻՄՈՆՅԱՆ
