ԱՄՆ ոստիկանությունը Թուրքիայի նախագահ Ռեջեբ Թայիփ Էրդողանի թիկնապահների ձերբակալության օրդեր է տվել: Նրանք կասկածվում են Վաշինգտոնում մայիսին տեղի ունեցած ցույցի ժամանակ ցուցարարներին ծեծի ենթարկելու մեջ, հաղորդում է Lenta.ru-ն:
Վաշինգտոնի ոստիկանության ղեկավար Փիթեր Նյուզեմը հայտարարել է, որ հետախուզման մեջ է գտնվում Էրդողանի 9 թիկնապահ, Թուրքիայի ոստիկանության 3 սպա և 2 կանադացի:
ԱՄՆ ոստիկանության այս որոշումը մեկնաբանել է Թուրքիայի նախագահը:
«Երբ ես ԱՄՆ-ում էի, PKK-ի և FETO-ի անդամները իմ գտնվելու վայրից 40-50 մետր հեռավորության վրա ակցիա էին կազմակերպել: Ամերիկյան ոստիկանությունը ոչինչ չէր ձեռնարկում: Եթե Թուրքիայում նման բան տեղի ունենար, ի՞նչ կլիներ: Երեկ ձերբակալել են մեր երկու քաղաքացիների, իմ 12 թիկնապահների ձերբակալության թույլտվություն են տվել: Դա ի՞նչ օրենք է: Եթե իմ թիկնապահներն ինձ չպաշտպանեն, ապա ինչու՞ եմ ես նրանց տանում Ամերիկա»,- ասել է Էրդողանը:
Հաղորդվում է նաև, որ Թուրքիայում ԱՄՆ դեսպան Ջոն Բասսին կանչել են Թուրքիայի ԱԳՆ:
Հիշեցնենք, մայիսի 16-ին Էրդողանի՝ Վաշինգտոն կատարած այցի ընթացքում ԱՄՆ-ում Թուրքիայի դեսպանի նստավայրի առաջ բախումներ տեղի ունեցան Էրդողանի այցի դեմ բողոքող ակցիայի մասնակիցների և նրա թիկնապահների միջև: Կռվի հետևանքով վիրավորվել էր 9 մարդ, ընդ որում, նրանցից երկուսը՝ լուրջ վնասվածքներ էին ստացել:
Պատրաստեց Վիկտորյա ԱՆԴՐԵԱՍՅԱՆԸ
