Վերջին օրերին կրկին բուռն քննարկումների տեղիք է տվել ՀՀ օրհներգի փոփոխության հարցը: Պատճառը օրերս «Le Club de Richard Findykian» հաղորդաշարով Շառլ Ազնավուրի հայտնած միտքն է, թե ինքը կամենում է Ժորժ Կառվարենցի «Քեզ համար, Հայաստան» երգը տեսնել որպես Հայաստանի Հանրապետության օրհներգ:
Aravot.am-ի հետ զրուցում անդրադառնալով թեմային` կոմպոզիտոր Յուրի Հարությունյանն ասաց. «Նախ՝ Շառլ Ազնավուրը երգիչն է այդ ստեղծագործության, հեղինակը Ժորժ Կառվարենցն է: Եթե հիմն դառնա, պետք է կոմպոզիտորի անունը գրվի, ոչ թե երգչի»:
Յուրի Հարությունյանը հետեւյալ կարծիքի է. «Ես չեմ կարծում, թե «Քեզ համար, Հայաստանը» արժանի է ՀՀ հիմնը լինել: Շատ լավ երգ է, տպավորիչ, ազդեցիկ, ֆիլմում իր տեղը գտել է, շատ երգիչներ եւս, Շառլից բացի, այն լավ երգում են, բայց այդ ստեղծագործությունը մի քիչ մեղեդային է եւ քնարական հիմնի համար»:
Կոմպոզիտորը գտնում է, որ լավագույն օրհներգը Խաչատրյանականն է. «Դա իմ կարծիքն է, որը չի փոխվել»:
Գոհար ՀԱԿՈԲՅԱՆ
