Հավաքական անվտանգության պայմանագրի կազմակերպության (ՀԱՊԿ) տարածությունում խնդիրները պետք է լուծվեն ինքնուրույն՝ առանց «օտարերկրյա պոլիտբյուրոյի»: Այս մասին հայտարարել է Բելառուսի նախագահ Ալեքսանդր Լուկաշենկոն ՀԱՊԿ անդամ-երկրների անվտանգության խորհրդի քարտուղարների հետ հանդիպմանը:
«Շատ կցանկանայի, որ մեր ունեցած խնդիրները մենք ինքներս լուծենք: Սեղանի շուրջ՝ Մինսկում, Մոսկվայում, Երևանում և ՀԱԿՊ երկրների այլ քաղաքներում: Որպեսզի ազդեցություն չլինի այլ պետությունների, խմբերի և կլոր սեղանների կողմից: Առավել ևս, որ մենք այդ խնդիրները կարող ենք լուծել և՛ Ղարաբաղում, և՛ Մերձդնեստրում, և՛ Ուկրաինայում: Դրանք մեր խնդիրներն են: Մենք դրանք պետք է լուծենք առանց օտարերկրյա պոլիտբյուրոների և միջամտության»,- ասել է Լուկաշենկոն:
Նա նշել է, որ եթե հաջողվի ՀԱՊԿ տարածությունում հարթել առկա անկայունության կետերը, ապա կազմակերպության հեղինակությունը զգալիորեն կբարձրանա:
«Կասկած չկա, որ միայն համատեղ ջանքերով մենք կարող ենք ապահովել մեր ազգային շահերի պաշտպանությունը»,- ասել է նա:
Բելառուսի նախագահի խոսքով՝ այդ առումով շատ բան կախված է անվտանգության խորհուրդների քարտուղարներից, քանի որ նրանք ունեն հատուկ լիազորություններ և ուղղակիորեն ենթարկվում են պետության ղեկավարին:
Պատրաստեց Վիկտորյա ԱՆԴՐԵԱՍՅԱՆԸ
